बुटवल । विद्यार्थीहरु एक्कासी बेहोस हुन थालेपछि नवलपरासीको परासीस्थित आदर्श माध्यामिक विद्यालय बन्द गरिएको छ ।
सोमबार अध्ययन गर्न आएका विद्यार्थीहरुमध्ये ५ जना बेहोस भएका थिए । मंगलबारफेरि ति ५ जनासहित थप ५ गरी १० जना बेहोस भएपछि विद्यालय दुई दिनका लागि बन्द गरिएको प्रधानाध्यापक दीपक भट्टराईले बताए ।
बेहोस हुने विद्यार्थी सबै १३ देखि १५ वर्ष उमेर समुहका छात्रा हुन् । केही छात्रा बिहानको प्राथना सकेर जाने क्रममा सिढीमा बेहोस भएका थिए भने केही कक्षा कोठामा बेहोस भएका थिए ।
बेहोस भएकाहरुलाई तत्कालै पृथ्वीचन्द्र अस्पतालमा भर्ना गरिएको थियो । सामान्य उपचारपछि उनीहरु घर फर्केका छन् । बेहोस हुने धेरै छात्रा एकै परिवारका (दाजुभाईका छोरी) छन् । केही छिमेकी छन् । बेहोस भएका सबै एउटै गाउँका हुन् । अस्पतालका मेडिकल सुपरिटेण्डेण्ट डा. मोहम्मद नुरुल होदाले बेहोस भएर अस्पताल आएका सबै छात्राले तल्लो पेट दुखेको बताएका थिए ।
बेहोस भएका छात्राहरुको लक्षणमा शरीर पूरै कडा हुनुका साथै लामो– लामो सास फेरेका थिए । धेरैजसो पाठेघरमा समस्या भएका महिलाहरुमा यस्तो समस्या देखिने गरेको होदाले बताए । रजश्वला(मिन्स) हुने समय भएका र भईसकेका केही महिलाहरुमा यदाकदा यस्तो समस्या देखिने गरेको होदाले बताए । यो रोग भएपनि ठूलो समस्या नभएको डा. होदाको भनाई छ ।
छात्राहरु बेहोस भएपछि अस्पतालले मनोसामाजिक परामर्शसहितको चिकित्सकको टोली विद्यालयमा पठाएको थियो । छात्राहरु बेहोस भएपछि अभिभावहरु आएर विद्यालयमा भूत प्रेत रहेको भन्दै पूजाआजा गर्न भनेका थिए । देवी देउता र भूत प्रेतको पछि लाग्नु हुँदैन । सामान्य समस्या भएको र त्यसलाई सहज रुपमा लिनका लागि जानकारी दिन बुधबार अभिभावक र शिक्षकहरुलाई बोलाएर कार्यक्रम गर्न लागिएको होदाले जानकारी दिए। यो एक प्रकारको रोग रहेकाले बारम्बार त्यसलाई सम्झि राख्न र अरुले पनि त्यसलाई सम्झाउने प्रयास गर्न नहुने डा. होदाको सुझाव छ ।