यसैबीच सोमबार राती भएको खेलमा एकेडेमी गुजरात भारत र गण्डकी प्रदेश भलिवल संघ विजयी भएका छन । खेलमा गण्डकी प्रदेश भलिवल संघले कोशी प्रदेश भलिवल संघलाई २५–१७, २५–१३, २५–२२ बनाउंदै सोझो सेटमा पराजित गरेको हो ।

प्रतियोगितामा उत्कुष्ट खेल प्रदर्शन गरेको गण्डकीका खेलाडी बिष्णु क्षेत्रीलाई नगद सम्मान गरिएको थियो । दोस्रो खेलमा गुजरातले विभागिय टिम त्रिभुवन आर्मी क्लवलाई ३–१ को सेटमा पराजित गरेको हो ।निक्कै प्रतिस्प्रर्धात्मक खेलमा पहिलो र दोस्रो सेट २५–२३, २५–२० अंकको जितसंग गुजरातले अग्रता लिएको थियो ।

तेस्रो सेटमा भने बिभागिय टिम त्रिभुवन आर्मी २५–१२ को अंकसहित जित निकाल्दै फर्कियो । चौथौ सेटमा भारतको गुजरातले २५–२२ अंकले विजयी भयो ।

खेलमा उत्कृष्ट प्रदर्शन गरेका गुजरातका आरएन बलियान नगदसहित सम्मानित गरिएको थियो । मंगलबारको पहिलो खेल आयोजक मणिमुकुन्द भलिवल क्लब, तिलोत्तमा र विभागिय टिम एपिएफ क्लब, काठमाडौ बिचमा हुने छ भने दोस्रो खेल कोशी प्रदेश भलिवल संघ र विभागिय टिम नेपाल पुलिस क्लब बिच हुने अफीसियल रेफ्री रामबहादुर थापाले बताए ।

प्रतियोगितामा प्रथम हुनेले नगद रू ३ लाख ११ हजार एक सय ११, दोस्रो हुने टिमले नगद २ लाख ११ हजार एक सय ११ रुपैयां, तेस्रो हुनेले १ लाख ११ हजार एक सय ११ रुपैयां तथा कप, मेडल र प्रमाणपत्र पाउने छन । सान्त्वना हुने टिमले ६६ हजार ६ सय ६६ रुपैयां तथा कप र प्रमाणपत्र हात पार्ने छन ।

प्रतियोगितामा उत्कृष्ट खेलाडीले १५ हजार, बिधागत तर्फ ६ जना खेलाडीहरूलाई नगद १० हजारका दरले नगद र मेडल, प्रमाणपत्रले पुरस्कृत गरिने खेल संयोजक सुरेन्द्र गुरूङले बताउनुभयो । बैशाख १३ गते सम्म सन्चालन हुने प्रतियोगितामा पाकिस्तान, इरान र भारतका खेलाडीको सहभागिताले खेल रोमाञ्चक भइरहेको आयोजक क्लबका निवर्तमान अध्यक्ष मिलन रानाले बताए ।

रातको समयमा शितल मौसम हुने भएकाले दर्शकहरुले पहिलोपटक राष्ट्रिय अन्तर्राष्ट्रिय खेलाडीको रोमाञ्चक खेल हेर्न पाउंदा खेलप्रेमीहरु राति १० बजेसम्म खेल मैदानमा खचाखच हुने गरेका रानाले बताए ।

प्रतियोगिता सम्पन्न गर्न लाग्ने ठूलो खर्च देश विदेशमा रहेका खेलप्रेमी र उद्योगी व्यवसायी संग चन्दा सहयोग मागेर गरिएको आयोजक क्लबका अध्यक्ष लोकेन्द्र भण्डारीले बताए ।