बुटवल पब्लिक स्कुलले “दोस्रो जिल्ला स्तरीय अन्तर विद्यालय सेभेन–ए साइड फुटबल प्रतियोगिता–२०८२” आयोजना गर्ने भएको छ।
प्रतियोगिता २०८२ साल फागुन ०६ र ०७ गते दुई दिनसम्म सञ्चालन हुने विद्यालयले जानकारी दिएको छ।
यस प्रतियोगितामा जिल्लाका ८ वटा विद्यालय सहभागी भई प्रतिस्पर्धामा उत्रिने छन्। प्रतियोगिताका सबै खेलहरू बुटवल पब्लिक स्कुलकै आफ्नै स्टेडियममा सञ्चालन गरिनेछ।
विद्यालयका अनुसार प्रतियोगिता विद्यार्थीहरूमा खेलकुद भावना, अनुशासन, टोलीगत सहकार्य तथा नेतृत्व क्षमता विकास गर्ने उद्देश्यले आयोजना गरिएको हो।
यस प्रतियोगितालाई अझ विशेष बनाउने कुरा के छ भने यो नेपालमै पहिलो पटक विद्यालय स्तरमा आयोजना हुन लागेको रात्रीकालीन (Night Time) फुटबल प्रतियोगिता हो।
विद्यालयले आधुनिक प्रकाश व्यवस्थासहित रात्रीकालीन खेल सञ्चालनको तयारी पूरा गरिसकेको जनाएको छ।
आयोजक विद्यालयले प्रतियोगितालाई उत्साहजनक र ऐतिहासिक बनाउने लक्ष्य लिएको छ। साथै यस प्रकारका खेलकुद कार्यक्रमहरूले विद्यालयस्तरमा खेलकुद विकासका साथै प्रतिभा पहिचानमा सहयोग पुग्ने विश्वास व्यक्त गरिएको छ।
प्रतियोगिता सफल बनाउन विद्यालय प्रशासन, शिक्षक, विद्यार्थी तथा अभिभावकहरू समेत सक्रिय रूपमा जुटिरहेका छन्।
