विद्यालयले गत ४ बर्षदेखि अडिट नगरेकोले हालसम्म अनियमताबारे बाहिर आउन सकेको थिएन । विद्यालयले २०७८÷०७९ को अडिट गर्ने क्रममा उक्त रकम हिनामिना भएको पाईएको विद्यालयका बर्तमान प्रधानाध्यापक उमाकान्त अधिकारीले बताए।

२०७८÷०७९ को अडिट गत पौष १२ गते मात्रै सम्पन्न भएपछि विद्यालयमा अनिमियता भएको आफुहरुले थाहा पाएको विद्यालयका प्रधानाध्यापक अधिकारीले बताए ।

अधिकारी गत बैशाख महिनामा मात्रै प्रधानाध्यापक भएर गएका थिए। त्यसपछि मात्रै विद्यालयको हरहिसावको अडिट गर्ने क्रममा अनिमियता भएको पाईएको अधिकारीले बताए । अडिट गर्ने क्रममा विद्यालयका पुर्व लेखाप्रमुख लालबहादुर रुचालको नामबाट दुई किस्तामा ९ लाख २५ हजार ३ सय ९१ रुपैयां असुल गरेको प्रधानाध्यापक अधिकारीले बताए ।

२०७९ सालदेखि उक्त रकम विद्यालयको खातामा पनि नआएको र त्यसको हिसाव किताव पनि नभएको पाईएको अधिकारीले बताए ।

तत्कालिन अवस्थामा विद्यालय व्यवस्थापन समिति विघटन भएको अवस्थामा वडाअध्यक्ष यकबहादुर सुनार कार्यवहाक अध्यक्ष र प्रधानाध्यापक महेश थैव रहेका थिए । उक्त रकम करिव २ बर्ष विद्यालयको बैंक खातामा नभई व्यक्तिहरुले चलाएको पाईएको छ ।

विद्यालय व्यवस्थापन समिति र नगरपालिकाको शिक्षा शाखाले विद्यालयका कर्मचारीलाई नियमन गर्न नसक्दा विद्यालयमा आर्थिक हिनामिना भएको स्थानीयको आरोप छ । स्थानीय युवाहरुले विद्यालयको आर्थिक हिनामिना भएको भन्दै विद्यालयमा नाराबाजी समेत गरेका थिए ।

उनीहरुले विद्यालयले बार्षिक रुपमा नगरपालिकाको शिक्षा शाखालाई आर्थिक अडिट बुझाउनु पर्नेमा नगरपालिकाले वेवास्ता गर्दा आर्थिक हिनामिना भएको स्थानीय मिनबहादुर गाहाले बताए ।

विद्यालयको आर्थिक हिनामिना गर्नेलाई कानुनी कार्वाही गर्नुपर्ने बताउंदै कार्वाही नगरेमा थप आन्दोलन गर्ने गाहाले बताए ।

युवाहरुले विद्यालय व्यवस्थापन समितिको बैठक बस्ने क्रममा विद्यालयमा नै पुगेर विरोध गरेका थिए । विद्यालयमा भएको आर्थिक हिनामिनाको वारेमा तत्कालिन लेखा प्रमुख र पुर्व प्रधानाध्यापकलाई बोलाएर छलफल गर्न लागिरहेको विद्यालय व्यवस्थापन समितिका अध्यक्ष एवं देवदह १०, का वडाअध्यक्ष यकबहादुर सुनारले बताए ।