चामल, मासु, अण्डा, घिउ र विभिन्न मसलाको स्वाद सहित एउटै थालीमा पस्किने विरयानी मुस्लिम समुदायको विशेष परिकार मानिन्छ ।
भारतमा मुगल शासनकालमा सुरु भएको मानिने विरयानी पाकिस्तान र भारतको विशेष खाना समेत हो । रोल्पाका जनक खड्का भने विगत दुई वर्षदेखि बुटवलका खानाका पारखीहरुलाई विरयानीको स्वाद चखाई रहेका छन् ।
सधै नेपाली दाल, भात, तरकारीको स्वादमा भुलेका बुटवलका उपभोक्ताको जिब्रोलाई अहिले हैदरावादी मट्का विरयानीको स्वादले पनि लोभ्याउन थालेको छ । रोल्पाको सुनिल स्मृति गाउपालिका गजुरमा जन्मिएका जनक भारतीय सेनामा जागिरे रहेका बुवा मनबहादुर खड्कासग सानो उमेरमै भारतको हैदरावाद गएका थिए । आफ्नो पढाईसंगै विरयानी बनाउने सिप पनि जनकले भारतमै सिके ।
०७६ सालसम्म हैदरावादमै होटल चलाएका जनकले विगत दुईवर्ष देखि बुटवलको अमरपथ र ९ महिनादेखि नेपालगञ्जरोडमा गरि दुईस्थानमा हैदरावादी मट्का विरयानी होटल चलाउँदै आएका छन् । दुईवटा होटलको मासिक डेढ लाख घरभाडा बुझाउने जनकले दैनिक १ लाख भन्दा बढिको विरयानी विक्री गर्ने बताए ।
‘पहिलो दिन दुईकिलो चिकन र दुईकिलो चामलको विरयानी बनाएका थियौं, अहिले दैनिक पौने दुईक्वीन्टल मासु र ८० किलो चामलको विरयानी पाक्ने गर्छ’ जनकको दावी छ । १४ जना कामदारले रोजगारी पाएको विरयानी हाउसमा भान्साको मुख्य काम र हिसाबकिताबको जिम्मेवारी भने परिवारका सदस्य मिलेर गर्छन् ।
बजारबाट सामान मगाउने र मसला बनाउने जनकको जिम्मेवारी छ भने भान्साको मुख्य जिम्मेवारी श्रीमती डिला खड्काको हातमा छ । हिसाबकिताव छोरीहरु चन्द्रिका र चन्द्राले सम्हाल्छन् । हालै एसईई परिक्षा दिएकी कान्छी छोरी विष्णुपनि होटलमा सघाउन थालेकी छन् । घरको सबै परिवार खटिने भएकोले कारोबारको ३५ प्रतिशत जति मुनाफा निस्किने जनकले बताए ।
