महेन्द्र बहुमुखी क्याम्पस दाङबाट स्नातक तहसम्म अध्ययन गरेकी शर्मा २०५१ मा तत्कालीन नेकपा माओवादीको युवा संगठन वाईसीएलको केन्द्रीय सदस्य, २०५३ सालदेखि २०५७ सालसम्म माओवादीको महिला संगठन अनेम संघ (क्रान्तिकारी)की केन्द्रीय अध्यक्षको जिम्मवारीमा रहेर काम गरिन्। 

२०५७ सालमा भएको माओवादीको राष्ट्रिय सम्मेलनबाट केन्द्रीय सदस्य र काठमाडौं उपत्यकाका उपब्यूरोको प्रमुख भएर काम गरेकी शर्माले दाइजो प्रथा, महिला हिंसा विरुद्ध आवाज उठाउँदै आएकी छन्। 

नेकपा माओवादीबाट भूमिगत राजनीति गरिरहेका वेला शर्मा २०५८ चैतमा काठमाडौंको चाबहिलबाट पक्राउ परेकी थिइन्। पक्राउपछि तत्कालीन शाही नेपाली सेनाबाट यातना भोगेकी थिइन्। २०५९ चैत ३१ गते सरकार र माओवादीबीच वार्ता शुरू भएपछि उनी रिहा भएकी थिइन्। उनी पटक पटक जेलमा परेकी थिइन्।

जेलबाट छुटेपछि पनि शर्माको राजनीतिक यात्रा सहज भएन। जेलमा आत्मसमर्पण गरेको आरोप लगाउँदै पार्टीले निष्कासन गर्‍यो। तर, केही महीनापछि पार्टीले कारबाही फुकुवा गर्यो। उनी पार्टीको काममा सक्रिय भइन्।

पार्टीमा गरेको योगदानका कारण २०७० र २०७४ मा समानुपातिकबाट प्रतिनिधि सभा सदस्य भइन्। पार्टी अध्यक्ष पुष्षकमल दाहालकी विश्वासपात्र शर्मा २०७० को संविधानसभा सदस्य भएको वेला पार्टीकी प्रमुख सचेतक र २०७२ मा सामान्य प्रशासन मन्त्री समेत बनेकी थिइन्। उनले संसद्को राज्यव्यवस्था तथा सुशासन समितिको सदस्यको जिम्मेवारी पनि निर्वाह गरेकी छन्।

शर्मा माओवादी केन्द्रका नेता तथा लुम्बिनी प्रदेशका निवर्तमान अर्थमन्त्री कृष्णध्वज खड्काकी श्रीमती हुन्। उनको स्थायी घर प्यूठान हो।