भैरहवास्थित गौतमबुद्ध अन्तर्राष्ट्रिय विमानस्थलबाट थाईल्याण्ड मुख्यालय रहेको वायुसेवा कम्पनी थाई एयर एशियाले पुनः व्यावसायिक उडान गर्ने भएको छ ।
गत कार्तिक १८ गतेदेखि यस विमानस्थलबाट व्यावसायिक उडान थालेको कम्पनीले विभिन्न कारण देखाउँदै बीचमा उडान स्थागित गरेको थियो ।
केही समय अघि कम्पनीले भैरहवा विमानस्थलबाट उडान अनुमतिको माग गर्दै नेपाल नागरिक उड्डयन प्राधिकरणमा पेश गरेको निवेदनसहितको ‘विन्टर सेड्युल’ स्विकृत भएको गौतमबुद्ध अन्तर्राष्ट्रिय विमानस्थलका सूचना अधिकारी विनोदसिंह राउतले क्लिक लुम्बिनीलाई जानकारी दिए ।
उनले थाई एयर एशियाले अगामी कार्तिक ९ गते देखि साताको दुई दिन आईतबार र बधुवार उडान गर्ने तालिका रहेको बताए । विमान कम्पनीले विगत जस्तै बैंकक–भैरहवा–बैंकक सिधा उडानको अनुमति पाएको छ ।
हाल विमानस्थलबाट कुनै पनि अन्तर्राष्ट्रिय उडान छैन । सरकारले अन्तर्राष्ट्रिय विमान कम्पनीहरुलाई भैरहवाबाट सेवा प्रदान गर्दा विभिन्न सहुलियत दिने भएपनि उनीहरु उडानका लागि आएका छैनन् ।
नेपाल एयरलाईन्सले समेत यस विमानस्थललाई छाडेर काठमाडौं केन्द्रित मात्र सेवा प्रदान गर्दा सरकारको आलोचना हुँदै आएको छ । विगतमा भैरहवा विमानस्थलबाट नेपाल एयरलाईन्सका साथै कतार एयरवेज, फ्लाई दुबई, थाई एयर एशिया र जजिरा एयरवेजले उडान भरेका थिए ।
