जाहेरीकर्ताको पहिलो नम्बरमै नाम रहेकी रुपन्देही तिलोत्तमाकी पूजा न्यौपानेले आफूले रविविरुद्ध जाहेरी नदिएको सामाजिक सञ्जालमा लेखेकी छन् ।

यसअघि जाहेरीकर्ता नारायण बहादुर पहराई र गीता आचार्यले पनि रकम फिर्ताका लागि प्रहरीले अनुमतिविनै रविविरुद्ध आफूलाई प्रयोग गरेको सार्वजनिक रूपमै बताएका थिए ।

सुप्रिम सहकारी ठगी प्रकरणमा जिल्ला अदालत रुपन्देहीबाट १ करोड धरौटीमा छाडिएका लामिछाने उच्च अदालतको आदेशमा पुर्पक्षका लागि रुपन्देही कारागारमा छन् ।

पूर्वडीआईजी छविलाल जोशी पनि उनीसँगै छन् । तर जीबी राईसहित अन्य फरार प्रतिवादीहरूलाई भने प्रहरीले पक्राउ गर्न सकेको छैन । प्रहरीले उनीहरूलाई खोजी गर्नेतिर ध्यान नदिएको तर रविलाई राजनीतिक पूर्वाग्रहका आधारमा मुद्दा चलाएको रास्वपा कार्यकर्ताहरूले आरोप लगाउँदै आइरहेका छन् ।

सुप्रिम सहकारी ठगी प्रकरणमा सुरुमा रवि लामिछानेविरुद्ध जाहेरी परेकै थिएन । प्रहरीले पछि रविविरुद्ध पूरक जाहेरी आह्वान गरेर प्रतिवादी बनाएको रास्वपा लुम्बिनी प्रदेश उपाध्यक्ष शालिकराम घिमिरे बताउँछन् । सहकारी पीडितको रकम फिर्ता गर्नुपर्नेमा सरकारले रविलाई पक्राउ मात्रै गरेको बचतकर्ताहरू बुझ्न थालेका उनी बताउँछन् । ‘त्यसै कारण एकपछि अर्को गर्दै बचतकर्ताहरूले सामाजिक सञ्जालमा लेख्न थालेका हुन्,’ उनले भने ।

पूरक जाहेरीमा प्रहरीले नारायण पहराईसहित नाम सार्वजनिक गरेको थियो ।

रुपन्देही तिलोत्तमा निवासी पूजा न्यौपानेले पनि सुप्रिममा केही रकम बचत गरेकी थिइन् । त्यो रकम फिर्ता नपाएपछि आफूले निवेदन दिएको उनले फेसबुकमा लेखेकी छन् ।