ऋण लागेर आपत परी बिक्री गरेको घरको ६४ लाख रूपैयाँ पैसा नपाएपछि वृद्ध दम्पती न्यायका लागि जहाँतही भौतारिरहेका छन् । पत्रकार सम्मेलन गरे । वडामा धाए । जिल्ला प्रहरी कार्यालयमा धाए तर पनि पैसा आउँने मेसो नै छैन् ।
१५ धुरमा बनेको एक तले घर बिक्री गरेर लागेको क्रृण तिर्ने र बाँकी रकम औषधी उपचारका लागि खर्च गर्ने योजना बनाएका बृद्ध रेग्मी दम्पत्ती अहिले पैसा हातमा नपरेपछि पीडामा छन् ।

कपिलवस्तुका खुम्बस गिरीलाई मनरुपा रेग्मीले आफ्ना माईला ज्वाइ राजेश लम्साललाई राखेर ०७८ मंसिर १५ गते मालपोत कार्यालयबाट घर पास गरिदिएकी थिईन । घर खरिदकर्ता गिरीले दिएका चेककै भरमा घर पास गरेकी मनरुपा अहिले त्यीनै चेक छोपेर न्यायको अपिल गरिरहेकी छिन् ।

मनरूपाले आफ्नो नाममा रहेको कित्ता नम्बर २३८६ को जग्गा तथा घर कुम्भसको नाममा रजिस्ट्रेसन पास गरिदिएकी हुन । मनरुपाको घर खरिद गर्ने व्यक्ति ल्याउने बुटवल १२ की माया सुवेदी हुन । माया सुवेदीले गिरीलाई घर खरिदका लागि ल्याईन । ज्वाई राजेशले सासु मनरुपाको घर खरिद गर्ने बातावरण मिलाएका हुन ।

जग्गा खरिदकर्ताले दिएका चेकहरु । तर साटिएनन्

मध्यस्तकर्ता बनेकी तामनगरकी माया सुवेदी

‘पैसाको खाँचो थियो, अप्ठ्यारो परेपछि ऋण लिएर खर्च चलाएका थियौं, ज्वाइँको विश्वासमा परेर राजीनामा पास गरिदिएँ, तर पैसा कहिल्यै आएन’ मनरुपाले भनिन् । ७२ वर्षका रत्नखर र ६५ वर्षकी मनरूपका ६ छोरीमध्ये ५ जनाको बिहे भइसकेको छ । कान्छी छोरी १७ वर्षीया आशा रेग्मीले बाआमाको स्याहार गर्छिन ।

घर पास गर्दा गिरीले सोही दिनको मितिमा १० लाख रूपैयाँको चेक काटेर दिए । सो चेक पनि नसाटिएको र त्यसबापतको ४ लाख रूपैयाँ नगद ल्याएर दिएको मनरूपाले बताइन ।

मनरुपा संग घर खरिदकर्ता गिरीले दिएका ३ वटा चेक छन् । २०७८ माघ १५ गतेको मितिका लागि २५ लाख रूपैयाँको दोस्रो चेक काटिएको थियो भने २०७८ चैत ३० गतेका लागि २८ लाख रूपैयाँको तेस्रो चेक काटिएको थियो । ती सबै चेकको रकम जोड्दा ६३ लाख हुन आउँछ । त्यसबाहेक एक लाख रूपैयाँ छुट्टै नगद दिएकाले ६४ लाख रूपैयाँको हिसाब निस्किन्छ ।

तर, घर खरिद बिक्री गर्दा ७० लाखमा कागज भएको देखिएको छ । बाँकी ६ लाख रूपैयाँ बिचौलियाले आफ्ना लागि छुट्ट्याएको पाइएको छ ।
घर किनबेचमा मुख्य भूमिका खेलेकी बिचौलिया माया सुवेदीले धोका दिँदा ससुरालीसँगको पारिवारिक सम्बन्ध समेत बिग्रिने अवस्थामा पुगेको ज्वाइँ राजेशले बताए ।

दुवै पक्षबीच मध्यस्थकर्ताको भूमिका खेलेकी मायाले कुम्बसले घर खरिद गरेर पैसा नतिरेकाले आफू तनावमा परेको बताइन ।

रेग्मी दम्पतीको जग्गा खरिद गर्ने खुम्बस अहिले फोन अफ गरेर सम्पर्कविहीन बनेका छन । उनी सम्पर्कमै आउन चाहेका छैनन् ।

रेग्मी दम्पतीकी कान्छी छोरी आशाले दलालले आफ्नो सम्पत्ति खाइदिएपछि पारिवारिक पीडासँगै आफ्नो अध्ययनलाई समेत अघि बढाउन नसकेको गुनासो गरिन ।