बुटवल । देशभरका मुस्लिम समूदायले इस्लाम धर्मका प्रवर्तक हजरत मोहम्मद पैगम्बर सल्लाह अलैवसल्लामको जन्म जयन्ती (मोहम्मद डे) मनाएका छन् ।
नेपालका विभिन्न स्थान तथा विश्वभरका मुसलमान धर्मावलम्बीले इस्लाम धर्मका प्रवर्तक हजरत मोहम्मद पैगम्बर सल्ललाहु अलैवसल्लामको १४९८ औँ जन्म जयन्ती मनाएका हुन् ।
बुटवलमा इस्लाम धर्मावलम्बीले बिहानैदेखि बाजागाजा र झण्डासहित बुटवल नगरको परिक्रमा गरी ‘मोहम्मद डे’ मनाए । यस्तै रुपन्देहीको भैरहवा लगाएत आसपासका जिल्लाहरु जस्तै अर्घाखाँची , पाल्पा , कपिलवस्तु , दाङ्ग र नेपालगन्ज जिल्लामा पनि ‘मोहम्मद डे’ मनाइएको छ ।
सहभागीहरुले राष्ट्रिय झण्डा सहित नगर परिक्रमा गरेका थिए ।
इस्लामी पात्रोको तेस्रो महिना रविउल्ल अवलको १२ तारिखको दिन नेपाली मुसलमानसहित विश्वभरिका मुसलमान धर्मावलम्बीले विभिन्न धार्मिक कार्यक्रम गरी मोहम्मद डे मनाउँदै आएको रजाए मुस्तफा जामे मस्जिद बुटवलका अध्यक्ष हाजी ईस्माईल अलिले बताए ।
‘हजरत मोहम्मदको जन्म इस्लामी पात्रो हिजरी सम्वत्को रविउल्ल अवल महिनामा साउदी अरबको मक्कामा बिबी आमिनाको कोखबाट भएको हो’ , अध्यक्ष अलिले भने, ‘उहाँको निधन ६३ वर्षको उमेरमा साउदीकै मदिनामा भएको थियो। मोहम्मदको जन्मदिनमा विभिन्न नाअत शरिफ वाचन गर्ने तथा उहाँका उपदेश र वाणीको स्मरण गर्ने गरिन्छ ।’
