कर्मचारी, जनप्रतिनिधि र मर्मत केन्द्रसँगको मिलेमतोमा हरेक वर्ष राज्यको ढुकुटीबाट सवारी मर्मतमा अचाक्ली खर्च हुँदै आएको पाइएको हो ।

यसले प्रदेशको खर्चमा भार पर्नुका साथै प्रदेशप्रति नागरिकमा अविश्वास बढाउँदै लगेको छ । केन्द्र सरकारले सार्वजनिक खर्चमा मितव्ययिता अपनाउने भन्दै केन्द्रदेखि प्रदेशसभासम्म सांसदका सचिवालय सुविधा खारेज गरेको छ ।

कसको सवारी मर्मतमा कति खर्च?

एकैजना पदाधिकारीको सवारी मर्मत खर्च ५ लाख भन्दा माथि छ ।

लुम्बिनी प्रदेशसभाका सभामुख तुलाराम घर्तीमगरले दुईवटा सवारी प्रयोग गर्ने गरेका छन् ।

घर्ती मगरले बा १ झ ९७२९ नम्बरको गाडी मर्मतमा ४ लाख ६९ हजार रुपैयाँ र अर्को प्रदेश ०३–०१–००२ झ ५२४४ नम्बरको गाडी मर्मतमा ८० हजार १८३ रुपैयाँ खर्च भएको बिल प्रदेशसभामा बुझाएका छन् ।

सभामुखको सचिवालयमा प्रयोग भइरहेको बा २ झ २२८४ नम्बरको गाडी मर्मतमा ६९ हजार ४५२ रुपैयाँ खर्च भएको छ ।

भौतिक पूर्वाधार तथा विकास समितिका सभापति रामजीप्रसाद घिमिरे चढ्ने बीएए १३०६ नम्बरको गाडी मर्मतमा ५ लाख ३७ हजार ६३२ रुपैयाँ खर्च भएको छ ।

प्रदेशसभा सार्वजनिक लेखा समितिकी सभापति माया पुन चढ्ने गाडीको मर्मत खर्च पनि ५ लाखभन्दा बढी छ । पुनले प्रयोग गरेको बीएए १३०३ नम्बरको गाडी मर्मतमा ५ लाख १ हजार ६९२ खर्च उठेको छ ।

अझै प्रदेशसभाका पदाधिकारीले प्रयोग नगरी फिर्ता गरेको बीएए १३०१ नम्बरको गाडीको मर्मत खर्च ६ लाख १६ हजार ३३६ रुपैयाँ रहेको देखिन्छ । यो गाडी पूर्व सभामुख पूर्णबहादुर घर्ती मगरले फिर्ता गरेका थिए ।

कृषि वन तथा वातावरण समितिका सभापति विश्वप्रेम पाठक चढ्ने बीएए १३०० नम्बरको गाडी मर्मतमा ४ लाख २६ हजार २४४ रुपैयाँ, नेकपा माओवादी केन्द्र संसदीय दलका नेता तथा पूर्व मुख्यमन्त्री जोखबहादुर महरा चढ्ने लु १ झ ६७९ नम्बरको गाडी मर्मतमा १ लाख ६ हजार ५६ रुपैयाँ खर्च भएको छ ।

कांग्रेस संसदीय दलका नेता तथा पूर्व मुख्यमन्त्री डिल्लीबहादुर चौधरी चढ्ने गरेको लु १ झ ६८६ नम्बरको गाडी मर्मतमा २ लाख १९ हजार ६४९ रुपैयाँ, विशेषाधिकार समितिका सभापति गिरिधारीलाल न्यौपाने चढ्ने बीएए १२९७ नम्बरको गाडी मर्मतमा १ लाख ५९ हजार ७६८ रुपैयाँ खर्च भएको छ ।

यस्तै, प्रदेश मामिला तथा कानून समितिकी सभापति दिलकुमारी बुढा चढ्ने बीएए १२९८ नम्बरको गाडी मर्मतमा ३ लाख १० हजार ४०४ रुपैयाँ खर्च उठेको छ ।

सामाजिक विकास समितिका सभापति यमबहादुर नेपाली चढ्ने लु १ झ ४५७ नम्बरको गाडी मर्मतमा ३ लाख ६० हजार ३६३ रुपैयाँ, अर्थ उद्योग तथा पर्यटन समितिका सभापति राजुप्रसाद श्रेष्ठ चढ्ने बीएए १३०२ नम्बरको गाडी मर्मतमा १ लाख ६९ हजार ६८५ रुपैयाँ खर्च भएको छ ।

यस्तै, माओवादी प्रमुख सचेतक इन्द्रजीत थारू चढ्ने बीएए १२९६ नम्बरको गाडी मर्मतमा ३ लाख १ हजार ४५५, प्रमुख सचेतक जमुना ढकाल चढ्ने बीएए १३०५ नम्बरको गाडी मर्मतमा ३ लाख २४ हजार १९६, एमालेका प्रमुख सचेतक तुलसीप्रसाद चौधरी चढ्ने बीएए १२९९ नम्बरको गाडी मर्मतमा १ लाख १४ हजार ७५० खर्च भएको छ ।

यसैगरी, उपसभामुख मेनका खाँण चढ्ने लु १ झ ७५३ नम्बरको गाडी मर्मतमा ४८ हजार ४४१ रुपैयाँ, प्रदेशसभा सचिवालयको प्रयोजनमा रहेको बा १ झ ६७५७ नम्बरको गाडी मर्मतमा १ लाख ५१ हजार ९८३, सचिवालयकै बीएए १३०७ नम्बरको गाडीमा २ लाख १३ हजार ६९१ तथा बीएए १३०८ नम्बरको गाडीमा २ लाख ८६ हजार ५८४ रुपैयाँ खर्च भएको छ ।

गाडी मर्मतमै हरेक वर्ष आधा करोड बढी खर्च !

प्रदेशसभा सचिवालयसँग २० वटा ४ पाङ्ग्रे सवारी साधन छन् । यी सवारी मर्मतमा आधा करोडभन्दा बढी खर्च उठ्दै आएको छ । प्रदेशसभा सचिवालयका अनुसार ती २० वटा सवारी साधनको मर्मतमा मात्रै आर्थिक वर्ष २०८१/८२ मा ५२ लाख ८३ हजार ८६९ रुपैयाँ खर्च भएको प्रदेशसभा सचिवालयले जानकारी दिएको छ । यो गत वर्षभन्दा १३ लाख रुपैयाँले बढी हो ।

आर्थिक वर्ष २०८०/०८१ मा गाडी मर्मतका नाममा ३९ लाख ३३ हजार ७७१ रुपैयाँ खर्च गरेको थियो । प्रदेशसभाले सभामुख, उपसभामुख, संसदीय समितिका सभापति, संसदीय दलका नेता, प्रमुख सचेतकहरूलाई सवारी सुविधा प्रदान गर्छ । प्रदेशसभाका गाडी बुटवल र दाङको भालुवाङका दुईवटा ग्यारेजमा मर्मत गर्ने गरिन्छ ।

प्रदेशसभाको पहिलो कार्यकालमा खरिद गरिएका यी गाडीहरू बजार मूल्यभन्दा बढी भएको तत्कालीन सार्वजनिक लेखा समितिका सभापति डिल्लीबहादुर चौधरीको समितिले ठहर गरेको थियो ।

गाडी पुराना हुँदै जाँदा मर्मत खर्च बढी !

लुम्बिनी प्रदेशसभाका सचिव दुर्लभकुमार पुन मगरले गाडी पुराना हुँदै जाँदा खर्च बढी उठ्ने गरेको दाबी गरे ।

‘माननीयज्यूहरू प्रदेशका धेरै दुर्गम ठाउँमा पुग्नुपर्ने हुन्छ,’ पुनले भने, ‘गाडी पुराना हुँदै गएपछि छिटोछिटो बिग्रिँदा मर्मत खर्च बढी उठेको होला । अन्य कारणले बढी खर्च भएको भन्ने होइन ।’

प्रदेश मामिला तथा कानून समितिकी सभापति दिलकुमारी बुढाले गाडी पुराना भएर यात्रामा आफूले हैरानी भोग्दै आएको बताइन् ।

‘म रुकुमपूर्वकी हुँ । म धेरै अफरोड हिँड्नुपर्छ’ बुढाले भनिन्, ‘पहाडतर्फ जाँदा गाडी बिग्रिएर कति दुःख पाउने गरेकी छु । एकपटक लामो बाटो हिँड्यो भने गाडी बिग्रिन्छ, जसले गर्दा समयमा कार्यक्रममा नपुगेका घटना कति छन् ।’

गाडी मर्मतमा धेरै खर्च गरेको भन्ने कुरा सही नभएको सभापति बुढाको दाबी छ ।

प्रदेशसभा र सरकारको बढ्दो खर्चका गतिविधिले नागरिकमा प्रदेश संरचनाप्रति वितृष्णा बढ्दै गएको पारदर्शी सरोकार समूह रुपन्देहीका पूर्व अध्यक्ष अधिवक्ता महेन्द्रप्रसाद पाण्डे बताउँछन् ।

सांसदहरूले जनताप्रतिको दायित्व बुझ्नुपर्ने र सरकारले कस्नु आवश्यक रहेको उनले बताए ।