एमाले विभाजन, नेकपा एकीकृत समाजवादी गठन, नेकपा एसको महाधिवेशनमा पराजित र फेरि एमाले फिर्तीसँगै पूर्वमन्त्री झाँक्रीको संसदीय यात्रा राष्ट्रिय सभातर्फ अघि बढेको हो । विद्यार्थी पृष्ठभूमिबाट पार्टी राजनीतिमा आएकी झाँक्री राजनीतिका हरेक विषयमा डिबेट गर्न सक्ने क्षमता राख्छिन् ।

एमालेको विद्यार्थी संगठन अखिलको अध्यक्षदेखि राजनीतिमा होमिएकी उनी समानुपातिक सांसद र पार्टी विभाजनपछि शहरी विकास मन्त्रीसमेत बनेकी थिइन् । तीन वर्षअघि २०७९ सालको आमनिर्वाचनमा गुल्मी– २ बाट एमाले नेता तथा हालका उपाध्यक्ष गोकर्ण विष्टसँग पराजित भएकी उनले फेरि राष्ट्रिय सभाबाट संसदीय यात्राको थालनी शुरू गरेकी छन् ।

हालै सम्पन्न एमाले महाधिवेशनबाट केन्द्रीय सदस्य निर्वाचित झाँक्रीले गुल्मीबाटै प्रत्यक्ष चुनाव लड्ने चाहना राखेकी थिइन् । तर, गृहजिल्लाबाट उपाध्यक्ष गोकर्ण विष्ट उम्मेदवार बनेपछि पार्टीले उनलाई राष्ट्रिय सभामा पठाएको थियो ।

२०५४ मा एमाले विभाजन हुँदा नेकपा मालेमा लागेकी झाँक्री वामदेव गौतमसँग २०५८ सालमा एमालेमा फर्किएकी थिइन् । राजाको निरंकुश शासन शुरू सँगै उनी निरंकुशताविरुद्धको आन्दोलनमा जोडिइन् । २०६२/०६३ सालको जनआन्दोलनमा विद्यार्थी नेताको रूपमा झाँक्री अग्रमोर्चामा उभिएकी थिइन । झाँक्री स्पष्ट वक्ता, प्रगतिशील र आलोचनात्मक नेतृका रूपमा चिनिन्छिन् ।