बुटवलमा तीन अर्ब ५९ करोडको लगानीमा निर्मित पाँचतारे होटल ‘हायात प्यालेस’ सञ्चालनमा आएको छ । व्यावसायिक घरानामा दर्ज पौडेल र मालपानी दुई परिवारको लगानी छ, यो होटलमा । बुटवलका हायात ब्रान्डमा होटल प्यालेस शनिबारदेखि सञ्चालनमा आएको हो ।
–देशभर लगानीमा निराशा छाइरहेको बेला तपाईंहरूले बुटवलमा साढे तीन अर्बको लगानीमा पाँचतारे होटल सुरु गर्नुभयो । यस्तो ठूलो निर्णय कसरी सम्भव भयो ?
हो, लगानीकर्तामा आत्मविश्वास घटेको समय छ । तर हामीले बुटवलमा हायात प्यालेस सुरु गरेर त्यही निराशालाई चुनौती दिएका छौं । बुटवलमा स्वास्थ्य, शिक्षा र यातायात पूर्वाधार द्रुत गतिमा विकसित भइरहेका छन् ।
त्यसैले यो सहरलाई पर्यटन हब बनाउने हाम्रो दीर्घकालीन योजना हो । हामीले यो होटललाई सहरको गहना र प्रदेशको गौरवको रूपमा हेरेका छौं ।
–कोभिड र आर्थिक मन्दीका कारण धेरै परियोजना रोकिएका थिए, तपाईंहरू कसरी अघि बढ्नुभयो ?
हामीले आजभन्दा छ वर्षअघि हामीले लगानी सुरु गरेका हौँ । त्यतिबेला देशको स्थिति राम्रो थियो । त्यतिबेला लुम्बिनी प्रदेशको राजधानी पनि बुटवलमै थियो । भैरहवामा गौतमबुद्ध अन्तर्राष्ट्रिय विमानस्थल निर्माणाधीन अवस्थामा थियो ।
त्यही हिसाबले बुटवलमा उच्चस्तरीय होटलको आवश्यकता छ भन्ने महसुस गरी पर्यटन क्षेत्रमा पनि लाग्नुपर्छ भन्ने निर्णय गरेका थियौं । कोभिड महामारी र अर्थतन्त्रको सुस्त गतिका कारण ढिलाइ भयो । तर, हामीले कहिल्यै हार मानेनौं ।
निर्माणलाई निरन्तरता दिँदै अन्ततः आज हायात प्यालेस सञ्चालनमा ल्याउन सफल भयौं । यो निजी क्षेत्रको दृढ इच्छाशक्तिको प्रतीक हो ।
–अब कसरी अगाडि बढाउने योजना छ ?
हामी आउँदो मंसिर १० गते ग्रान्ड ओपनिङ गर्दैछौं । त्यसपछि हामी राष्ट्रिय तथा अन्तर्राष्ट्रिय सम्मेलन, विवाह समारोह र व्यापारिक मेला जस्ता कार्यक्रमका लागि होटललाई पूर्ण गन्तव्यका रूपमा अघि बढाउनेछौं । हायात ब्रान्ड र हाम्रो व्यवस्थापन क्षमताले यो सम्भव बनाउनेछ ।
–होटलमा कति जना लगानीकर्ता हुनुहुन्छ र लगानी कति छ ?
करिब साढे तीन अर्ब रुपैयाँभन्दा बढी लगानी परेको छ । ग्लोबल आइएमई बैंकको ६५ प्रतिशत ऋण लगानी छ । बाँकी हिस्सा हामी, पौडेल र मालपानी दुई परिवारले गरेको हो । होटलको स्वामित्वमा अरू कसैको, विशेषगरी कुनै नेताको लगानी छैन भन्ने स्पष्ट पार्न चाहन्छु ।
–हायात जस्तो अन्तर्राष्ट्रिय ब्रान्ड बुटवलसम्म ल्याउन कसरी सम्भव भयो ?
हायात विश्वकै प्रतिष्ठित होटल चेन हो । हामीले ‘सफ्रोन सिकी प्रालि’मार्फत यो परियोजना अघि बढायौं र हायात समूहसँग व्यवस्थापन सम्झौता गर्यौं । काठमाडौं बाहिर नेपालकै पहिलो हायात प्यालेस बुटवलमा सञ्चालनमा आउनु आफैंमा ठूलो उपलब्धि हो । यसले बुटवललाई अन्तर्राष्ट्रिय मापदण्डको गन्तव्य बनाउनेछ ।
–होटलका मुख्य सुविधा के हुन् ?
यो होटल जमिनमुनि दुई तला पार्किङ र माथि १० तला भएको आधुनिक संरचना हो । कुल पाँच हजार ७४६ वर्गमिटरमा फैलिएको छ, जहाँ ६ श्रेणीका १०९ कोठा छन् । एकै पटक २५० पाहुनालाई सेवा दिन सक्छौं । साथै, यहाँ अत्याधुनिक रेस्टुरेन्ट, स्विमिङ पुल, ब्याङ्क्वेट हल, सेमिनार हल, स्पा, र विश्वस्तरीय क्यासिनो पनि छन्, जसको अन्तिम तयारी भइरहेको छ ।
–अर्थतन्त्र र रोजगारीमा कस्तो प्रभाव पार्ने अपेक्षा गर्नुभएको छ ?
होटल पूर्ण रूपमा सञ्चालनमा आएपछि करिब ३५० जनालाई प्रत्यक्ष रोजगारी मिल्नेछ । हामीले स्थानीय युवालाई प्राथमिकता दिँदै अन्तर्राष्ट्रियस्तरको सेवा प्रशिक्षण दिने योजना बनाएका छौं । यसले बुटवल र लुम्बिनी प्रदेशको आर्थिक चक्रलाई गतिशील बनाउनेछ ।
–पर्यटन क्षेत्रलाई कस्तो रूप दिन चाहनुहुन्छ ?
हाम्रो लक्ष्य बुटवललाई ‘स्टे डेस्टिनेशन’ बनाउने हो, ट्रान्जिट मात्र होइन । बुटवलबाट लुम्बिनी, रामग्राम, तिलौराकोट र पोखरा नजिक छन् । यी सबै मिलाएर दक्षिण एसियाको ‘गोल्डेन ट्रायाङ्गल टुरिज्म सर्किट’ बनाउन सकिन्छ । हायात प्यालेसले यो सम्भावनालाई ठोस रूप दिनेछ ।
–भारतीय पर्यटकका लागि पनि विशेष योजना रहेको सुनिन्छ, त्यसबारे के भन्नुहुन्छ ?
हो । बुटवल भारतको उत्तर प्रदेशसँग नजिक छ, जहाँ करिब २४ करोड जनसंख्या छ । त्यसको सानो प्रतिशत पनि नेपाल भ्रमणमा ल्याउन सकियो भने ठूलो फाइदा हुन्छ । हामीले धार्मिक, स्वास्थ्य र व्यावसायिक उद्देश्यका भारतीय पाहुनाका लागि विशेष प्याकेज योजना बनाएका छौं ।
