पौडी खेल्ने क्रममा रुपन्देहीको दानव नदीमा सोमवार डुबेर बेपत्ता भएका तीनैजना बालकको शव फेला परेको छ । जिल्ला प्रहरी कार्यालय, रुपन्देहीका अनुसार लुम्बिनी सांस्कृतिक नगरपालिका–२, अर्दौलीस्थित दानव नदीमा पौडी खेल्न गएका स्थानीय तीनजना बालक सोमवार दिउँसो १ बजेतिर डुवेर बेपत्ता भएका थिए ।
जिल्ला प्रहरी कार्यालयका डिएसपी तथा प्रबक्ता सुरज कार्कीले ती तीनैजना बालकको शव पेला परेको र पोष्टमार्टमको तयारी गरिएको जानकारी दिए । उनका अनुसार लुम्बिनी सांस्कृतिक नगरपालिका–२, अर्दौलीस्थित दानव नदीमा डुबेर बेपत्ता भएका स्थानीय १३ वर्षीय उमेश यादव, १४ वर्षीय राजन यादव र १२ वर्षीय मन्नु हरिजनको शव पेला परेको हो ।
जसमध्ये राजनको शव नदीमा हराएको स्थानमा हिलोमा डुवेको अवस्थामा र अन्य दुईजनाको शव डुवेको स्थानदेखि करिव १५ मिटर तल नदीमा फेला परेको थियो । उनीहरुको शव पोष्टमार्टमका लागि भीम अस्पतालमा राखिएको छ । घटनाको जानकारी पाउनासाथ नेपाल प्रहरी, शसस्त्र प्रहरी र स्थानीयसहितको टोलीले उनिहरुको खोजतलाश जारी राखेको थियो । सशस्त्र प्रहरीको गोताखोरले शव निकाल्न सफल भएको हो ।
