रुपन्देहीलाई बिकासको नयाँ उचाईमा लैजानका लागि भाषणले भन्दा पनि कामबाट देखाउने बताउँदै उनले यहाँ सम्पन्न भएका र सम्पन्न हुने चरणमा रहेका ठूला बिकास निर्माणका योजनाहरु उदाहरणको रुपमा रहेको उल्लेख गरे । ‘रुपन्देहीको बिकासका लागि के–के कुरा आवश्यक छन्, अझै के-के गर्नुपर्ने हो ? तपाईहरुले जनता समक्ष प्रतिवद्धता गर्नुस पूरा गर्ने काम मेरो भयो ।’-कार्यक्रममा सहभागी पार्टीका कार्यकर्ताहरुलाई पौडेलले भने, ‘अब हामी धेरै बोल्नुपर्दैन यहाँ जे-जति भएका छन्, कामबाट देखाएका छौँ, काम गरेरै देखाउने हो ।’

पौडेलले आफू अर्थमन्त्री हुँदा तिनाउ पुलमा सिग्नेचर ब्रिज निर्माणका लागि गरेको पहल साकार हुने चरणमा रहेको बताउँदै टेण्डर प्रक्रियामा अघि बढेको जानकारी गराए । त्यसका लागि आवश्यक बजेटको समेत व्यवस्था भैसकेको उल्लेख गरे । यसैगरी बुटवलदेखि पोखरासम्मको यात्रा अवधिलाई २ घण्टामा सीमित गर्नेगरी बिस्तारको योजना अघि बढेको जानकारी गराउँदै उनले, रुपन्देहीलाई बिकसित र पर्यटकीय शहरको रुपमा स्थापित गर्ने आफ्नो योजना रहेको उल्लेख गरे । भौतिक पूर्वाधारसँगै शिक्षा, स्वास्थ्य र मानवीय बिकासमा आफ्नो जोड रहेको बताए । संरचनाहरुको बिकास र पूर्वाधारले मात्रै जनताको आवश्यकता पूरा नहुने बताउँदै उनले अबको आफ्नो योजना रोजगार सिर्जना र स्वरोजगारमा केन्द्रित रहेको उल्लेख गरे ।