स्थानीय र त्यो होटेलको घरभेटीका अनुसार गोली प्रहार गर्ने ती युवक यसभन्दा पहिले पनि त्यहाँ आइरहने र ती युवतीलाई मन पराउने गरेका थिए तर उनले अस्वीकार गरेको बताउँदै आएकी थिइन् । केही दिनअघि दुवै जनाबिच भनाभन पनि भएर पछि शान्त भएको थियो । पाल्पाको रैनादेवी छहरा गाउँपालिका घर भई हाल बुद्धनगरमा होटेल सञ्चालन आएकी विष्टको कम्मरमाथि गोली लागेको हो। अहिलेसम्म छिमेकी र प्रहरीको भनाइलाई आधार मान्दा र प्रहरीसमक्ष घाइते टिकाले भनेको व्यक्ति एउटै भएको अनुमान गर्न सकिन्छ ।

जिल्ला प्रहरी कार्यालय रुपन्देहीका डिएसपी सुरज कार्कीका अनुसार ती युवतीलाई प्रेम चाहने भारतीय युवकबाटै गोली प्रहार भएको अहिलेसम्मको आकलन छ । ‘घाइते महिलाले भारतीय नागरिक आलम अन्सारीले आफूलाई गोली हानेको बताएको र उ पटक–पटक त्यहाँ आउने गरेको तथा आज पनि भारतीय नम्बर प्लेटको मोटरसाइकल लिएर त्यहाँ पुगेकोले त्यो आधारलाई बल पुराउँछ’ उनले भने ।

बुटवल ११ का वडा सदस्य तथा स्थानीय नकुल शाहीले पनि गोली हान्ने व्यक्ति त्यो युवतीलाई मन पराएको र उनले अस्वीकार गरेपछि हानेको आकलन गरिएको बताउँछन् । ‘घटनाको अनुसन्धानले सबै बताउला तर अहिलेसम्म हामीले बुझेअनुसार होटेलमा आउने ती भारतीय युवकले नै हानेका हुन् र यसको कारण मायाप्रेम नै हो’ उनले भने । नेपाल प्रेसमा खवर छ ।

इलाका प्रहरी कार्यालय बुटवलका प्रमुख प्रहरी नायव उपरीक्षक (डिएसपी) इन्द्रबहादुर रानाका अनुसार घटनामा भारतीय युवक रहेको प्रारम्भिक अनुमान गरिए पनि विस्तृत केही खुलेको छैन । “केही दिनअघि ती युवतीको एक जना भारतीय युवकसँग विवाद भएको थियो भन्ने सूचना प्राप्त भएको छ, त्यही विवादकै कारण सो युवकले गोली हानेको हुनसक्ने स्थानीयको आशंका छ” उनले भने । घटनामा भारतीय नम्बर प्लेटको मोटरसाइकल प्रयोग भएकाले प्रहरीले सबै सीमा नाकाहरुमा सम्भावित आरोपितको खोजी भइरहेको जानकारी दिएको छ।