रुपन्देहीको भैरहवास्थित गौतमबुद्ध अन्तर्राष्ट्रिय विमानस्थल (जीबीआईए)बाट कुवेतको जजिरा एयरवेजले पनि उडानको शुरूआत गरेको छ ।
विमानस्थल सञ्चालनको बेला उडान थाले पनि विभिन्न कारण देखाउँदै उडान स्थगित गरेको जजिराले शनिबार १७१ जना यात्रुसहित पुनः उडान थालेको हो ।
१७१ यात्रुसहित भैरहवा विमानस्थलमा शनिबार बिहान अवतरण गरेको जजिराले १६८ यात्रु लिएर कुवेत प्रस्थान गरेको गौतमबुद्ध अन्तर्राष्ट्रिय विमानस्थलका प्रवक्ता दीपक बज्राचार्यले जानकारी दिए ।
जजिराले विमानस्थल सञ्चालनपछि पहिलो अन्तर्राष्ट्रिय वायुसेवा कम्पनीको रूपमा व्यावसायिक उडान थालेको थियो ।
‘जजिराको राम्रो अकुपेन्सी छ,’ बज्राचार्य भन्छन्, ‘शुरूआतमा नै १७१ यात्रु ल्याउनु र १६८ यात्रु लैजानु धेरै राम्रो हो ।’
जजिराले हप्ताको तीन दिन मंगलबार, बिहीबार र शनिबार नियमित उडान गर्ने तय भएको छ ।
भैरहवा विमानस्थलबाट यसअघि थाइल्याण्डको वायुसेवा कम्पनी थाई एयर एशियाले नियमित उडान शुरू गरिसकेको छ ।
शनिबार एकै दिन जजिरासहित नेपाल एयरलाइन्स र फ्लाइ दुबईले उडानको शुरूआत गर्ने तालिका रहेको गौतमबुद्ध अन्तर्राष्ट्रिय विमानस्थल कार्यालयले जनाएको छ ।
