बुटवल । बुटवल सुख्खानगरमा रहेको सुपा देउराली मासु पसललाई बुटवल उपमहानगरपालिकाको अनुगमन टोलीले ५० हजार जरिवाना सहित मासु जफत गरी नष्ट गरेको छ ।
पटक–पटक बुटवलको अत्याधुनिक पशु बधशालाबाट मात्र खसी बोकालाई बध गरेर मासु विक्रि गर्न उपमहानगरपालिकाले आग्रह गरेपनि उक्त मासु पसलले अटेर गरेपछि तेस्रो चरणमा ५० हजार जरिवाना र मासु जफत गरिएको हो । बुटवल उपमहानगरपालिकाका अनुगमन तथा मुल्याकंन शाखाका अधिकृत ठगिश्वर पोख्रेलले बधशाला बाट बध नगरी घरमै बध गरेर फ्रिजमा राखेको साढे २६ केजी मासु बरामद गरी नष्ट गरेको जानाकारी दिए ।
व्यवसायीलाई पटक पटक जानाकारी दिदा समेत अटेर गरेकाले तेस्रो चरणमा ५० हजार जरिवाना गरिएको र अब फेरी पनि पसलमै खसी, बोका बध गरेको भेटिएमा पसल नै शिल गरिदिने उनको भनाई छ ।
अनुगमन टोलीले मंगलबार ३ वटा मासु पसलमा अनुगमन गर्दा २ वटा मासु पसलमा भने मासु भेटिएको थिएन । अनुगमनमा शसस्त्र प्रहरी, नेपाल प्रहरी, नगर प्रहरी, पत्रकार सहितको टोली पुगेको थियो ।
पहिलो चरणमा अनुगमनमा जांदा पसलमै बध गरेका यवसायीहरुलाई उपमहानगरपालिकाको अनुगमन टोलीले १० हजार जरिवाना गरेको थियो । दोस्रो पटकमा २५ हजार जरिवाना गरेको थियो ।
उक्त जरिवाना व्यवसायीहरुले भने बुझाएनन् । जरिवाना बुझाउन पत्र दिएपनि अटेर गर्नुका साथै खसी, बोकाको मासु पशु बधशालामा बध नगरी घरमै गरेको भेटिएपछि अनुगमन टोलीले ५० हजार जरिवाना तेस्रो पटकमा गरेको हो ।
