पछिल्ला दिनहरुमा लगातार मासु पसलहरुको अनुगमन भइरहेको छ ।

आईतबार पनि बुटवल उपमहानगरपालिकाको अनुगमन टोलीले १३ वटा पसलमा अनुगमन गरेको छ । सो अनुगमनका क्रममा सवै पसलहरुले खुल्ला रुपमै खसी, बोका बध गरेर मासु विक्रि गरिएको भेटिएको थियो ।

अनुगमन टोलीले सवै मासु पसललाई जनही १० हजारका दरले जरिवाना गरेको छ ।

बुटवल उपमहानगरपालिकाका अनुगमन तथा मुल्यांकन शाखाका ठगिश्वर पोखरेलले पटक–पटक पशुबधशालामा व्यवसायीलाई जान भनेपनि अटेर गरेपछि पहिलो चरणमा जनही १०÷१० हजार जरिवाना गरिएको बताए ।

बुटवल उपमहानगरपालिकाको पशु बधाला सञ्चालन र व्यवस्थापन ऐन, ०७९ (पहिलो संसोधन, ०८१) को दफा १७ को उपदफा २ बमोजिम आधुनिक पशु बधशालामा बध गरेको मासु बाहेक अन्यत्र बध गरेको मासु विक्रि वितरण गरेको पाइएपछि जरिवना गरिएको उनको भनाई छ ।
अनुगमन टोलीले पहिलो चरणमा १० हजार जनही जरिवाना लिने, त्यसपछि पनि खुल्ला बध गरेको भेटिए २५ हजार र तेस्रो पटक पनि खुल्ला बध गरेको भेटिएमा ५० हजार जरिवाना लिनेछ । अन्तिम समयमा पनि व्यवसायीले अटेर गरेमा मासु पसल नै बन्द गरिने उनले बताए ।

अनुगमन टोलीले ताहिर मासु एण्ड माछा पसल, पाल्पाली भैरव मासु पसल, न्यू अर्घाखाँची भुषाल मिट सप, हिमालय क्राउन बुचरी, पाण्डे मासु पसल, सुपा देउराली मासु पसल, गैरे मासु पसल, हाम्रो मासु पसल, आचार्य फ्रेस हाउस, न्यू रेहेमान मासु पसल, रेहान मासु पसल, पुरानो पहाडिया मासु पसल, न्यू पहाडी मासु पसल र हलाल मासु एण्ड माछा पसलमा अनुगमन गरेको थियो ।

अनुगमनका क्रममा व्यवसायीहरुले पशुबधशलामा गएर पशु बध गर्न नसकिने बताएका थिए । न्यू पहाडि मासु पसल सुख्खानगरका सञ्चालक ओम थापाले पशुबधशालामा गएर पशु बध गर्न नसकिने बरु पसल बन्द गर्नु परे गर्ने बताए ।