लुम्बिनी प्रदेशका प्रदेशसभा सदस्य चन्द्रकेश (सीके) गुप्ताविरुद्ध जिल्ला प्रशासन कार्यालयमा उजुरी परेको छ । उनीविरुद्ध श्रीमती कान्तीले आइतबार उजुरी दर्ता गराएकी हुन् ।
जिल्ला प्रशासन कार्यालय रुपन्देहीमा कान्तीकुमारी यादवले गुप्ता र उनको परिवारका अन्य सदस्यविरुद्ध मानसिक र शारीरिक हिंसाको आरोप लगाउँदै कारबाहीको मागसहित उजुरी दिएकी हुन् । रुपन्देहीको लुम्बिनी सांस्कृतिक नगरपालिका–७ निवासी गुप्तासँग नवलपरासीको प्रतापपुर गाउँपालिका–९ निवासी कान्तिको ६ वर्ष अगाडि विवाह भएको थियो ।
कान्तीले गत वर्ष कात्तिकमा पनि प्रशासनमा उजुरी दिएकी थिइन् । उक्त उजुरीपश्चात् दुवै जनालाई बोलाएर छलफल गरी मिल्ने सर्तमा पठाइएको प्रमुख जिल्ला अधिकारी गणेश अर्यालले बताए । ‘यसपटक शुक्रबार सीकेले सम्बन्ध विच्छेद गर्छु भनी निवेदन दर्ता गराएका थिए,’ उनले भने, ‘छलफलमा बोलाउँदा श्रीमती आउन नभ्याउने भइन र आइतबार उनले उजुरी दर्ता गरिन् ।’ उजुरीपछि पुनः छलफल गरेर मिलाउन खोजे पनि उनीहरुको कुरा नमिल्ने भएपछि छलफल र मिलनको फाइल बन्द गरिएको र कानुनी प्रक्रियामा जान सुझाइएको उनले बताए ।
गत वर्ष यस्तै उजुरी राष्ट्रिय महिला आयोगमा दिइएकोमा ‘अबदेखि यस्तो गल्ती नगर्ने’ भन्दै सीकेले लिखित प्रतिबद्धता जनाएका थिए । उनी रुपन्देहीको क्षेत्र नम्बर ५ (२) बाट निर्वाचित प्रदेशसभा सदस्य हुन् । सीके र कान्तिका दुई छोराछोरी छन् ।
कान्तिपुर बाट साभार
