लोकान्तर डट्कमका लुम्बिनी प्रदेश प्रतिनिधि प्रकाश आचार्य प्रेस काउन्सिल नेपालबाट पुरस्कृत भएका छन् । राष्ट्रपति रामचन्द्र पौडेलको उपस्थितिमा राष्ट्रपति कार्यालय शीतल निवासमा आयोजित समारोहमा आचार्य पुरस्कृत भएका हुन् ।
सञ्चार तथा सूचना प्रविधिमन्त्री पृथ्वीसुब्बा गुरुङ र प्रेस काउन्सिल नेपालका अध्यक्ष बालकृष्ण बस्नेतले पुरस्कार राशि र सम्मानपत्र हस्तान्तरण गरेका हुन् ।
रुपन्देहीको बुटवलमा रहेका सक्रिय पत्रकारिता गरिरहेका लोकान्तरकर्मी आचार्य ‘प्रेस काउन्सिल विधागत पत्रकारिता पुरस्कार’बाट सम्मानित भएका हुन् ।
सूचनाको हकको प्रयोग गर्दै आचार्यले प्रदेशसभा र प्रदेश सरकारका अनेक अनियमितताको समाचार लेखेका थिए । लोकान्तरमा समाचार प्रकाशित भएपछि प्रदेश सरकारका पूर्वमुख्यमन्त्री र सभाका पूर्वसभामुखले सरकारी सुविधाको गाडी फिर्ता गरेका थिए ।
प्रेस काउन्सिल नेपालको ५५औं वार्षिकोत्सवका अवसरमा विभिन्न पत्रकार पुरस्कृत भएका छन् ।
गोपालदास पत्रकारिता पुरस्कारबाट अन्नपूर्ण पोष्ट दैनिकका अखण्ड भण्डारी र सुरेन्द्रबहादुर बस्नेत पत्रकारिता पुरस्कारबाट बद्री सिग्देल पुरस्कृत भएका छन् ।
यस्तै प्रेस काउन्सिल आचार संहिता पुरस्कार रातोपाटी डट्कमलाई प्रदान गरिएको छ ।
