एक अर्व रुपियाँ लगानीमा बनाइएको केवल कार केही दिनअघि मात्रै व्यावसायिक रुपमा सञ्चालनमा ल्याइएको थियो । यसको औपचारिक उदघाटन भने अझै गरिएको छैन । स्थानीय उद्योगी व्यवसायीको लगानीमा निर्माण गरिएको केवलकारको व्यावसायिक यात्रामा साथ दिन र पर्यटकीय क्षेत्रको उजागर गर्नका लागि क्लवले नुवाकोटमा बैठक आयोजना गरेको अध्यक्ष पौडेलले जानकारी दिए ।

रोटरी क्लव अफ बुटवल चौतारीलाई सिद्धार्थ केवलकारले निःशुल्क रुपमा नुवाकोट लैजाने प्रवन्ध गरेको थियो । पाल्पाको तिनाउँ गाउँपालिकामा पर्ने नुवाकोट गढीमा भएको बैठकमा करिव ५० जना रोटरीयन सहभागी थिए ।

बैठकमा सहभागी भएका सिद्धार्थ केवलकार प्रालिका सञ्चालक केयरसिंह खड्काले नुवाकोट धार्मिक स्थल र यसको ऐतिहासिक महत्वको बारेमा जानकारी गराएका थिए ।

बालरोग विशेषज्ञ डा. सुन्दर न्यौपानेले रोटरी क्लव अफ बुटवल चौतारी जस्ता सामाजिक संस्थाले यस्ता ठाउँमा बैठक आयोजना गर्दा यसको प्रचारप्रसारमा समेत योगदान पुग्ने बताए । पश्चिम नवलपरासीका जिल्ला न्यायाधीश हरि पंगेनीले हालै मात्र सञ्चालनमा आएको सिद्धार्थ केवलकारले रोटरी जस्ता संस्थालाई साथमा लिएर अगाडि बढ्न सके सफलता प्राप्त गर्न सक्ने बताए । बैठकमा रोटरी क्लव अफ बुटवल चौतारीका एडमिन चेअर कृष्ण पाण्डे मानवअधिकार तथा शान्ति समाज रुपन्देहीको उपसभापतिमा तथा निवर्तमान अध्यक्ष दिनेशमणि सुवेदी जिल्ला सदस्यमा निर्वाचित भएकोमा सम्मान गरिएको थियो ।

सिद्धार्थ केवलकार प्रालिका अध्यक्ष माधव नेपालले केबलकारको बटम–स्टेसन रहेको पारि बुटवलको देउराली डाँडामा पार्क निर्माणका लागि विभिन्न संरचना बनिरहेका र केही समयमा टप स्टेशनमा समेत संरचना बन्ने जानकारी दिंदै रोटरी क्लव अफ बुटवल चौतारीले आफ्ना सदस्यहरुलाई नुवाकोटमा ल्याएर केवलकारको प्रचारप्रसार र यहाँको पर्यटन प्रवद्र्धनमा सकारात्मक भूमिका खेलेको बताए ।

क्लवका अध्यक्ष नुमेन्द्र पौडेलले आगामी दिनहरुमा पनि नुवाकोटमा यस्ता कार्यक्रमहरु ल्याउने जानकारी दिए ।