जसका कारण भदौ २७ गते (आज) साँझदेखि २९ गते बिहानसम्म विशेषगरी नेपालको पश्चिमी क्षेत्रमा मनसुन सक्रिय भई वर्षा हुने सम्भावना छ।

यस अवधि (भदौ २७ साँझदेखि २९ बिहानसम्म) गण्डकी, लुम्बिनी, कर्णाली र सुदूरपश्चिम प्रदेशका धेरै स्थान तथा बाँकी प्रदेशका केही स्थानमा मेघगर्जन/चट्याङ/हावाहुरीसहित हल्कादेखि मध्यमसम्म वर्षा हुने सम्भावना रहेको छ।

मौसम महाशाखाको विशेष बुलेटिनअनुसार उक्त अवधिमा लुम्बिनी र सुदूरपश्चिम प्रदेशका थोरै स्थानमा भारीदेखि धेरै भारी तथा बाँकी प्रदेशका एक/दुई स्थानमा भारी वर्षाको पनि सम्भावना छ। साथै सुदूरपश्चिम प्रदेशका एक/दुई स्थानमा अति भारी वर्षाको समेत सम्भावना छ।

सो सम्भावित वर्षाका कारण जिल्लागत हिसाबले कुनमा कति जोखिम छ भन्ने विषयमा मौसम महाशाखाले सूची सार्वजनिक गरेको छ।

जसअनुसार आठ जिल्ला- बर्दिया, सुर्खेत, कैलाली, कञ्चनपुर, डडेलधुरा, डोटी, बैतडी र अछाम वर्षाको उच्च जोखिममा छन्।

यसैगरी १९ जिल्ला– बारा, चितवन, नवलपरासी पूर्व, अर्घाखाँची, दैलेख, दार्चुला, पर्सा, स्याङ्जा, रुपन्देही, कालिकोट, बझाङ, तनहुँ, पाल्पा, सल्यान, बाजुरा, कपिलवस्तु, नवलपरासी पश्चिम, दाङ र बाँके मध्यम जोखिममा छन्।

मौसम महाशाखाका अनुसार पाँचथर, सिराहा, मकवानपुर, म्याग्दी, रुकुमपूर्व, डोल्पा, मोरङ, सप्तरी, बागलुङ, रोल्पा, मुगु, सुनसरी, धनुषा, कास्की, गुल्मी, हुम्ला, धनकुटा, रौतहट, पर्वत, प्युठान, जुम्ला, उदयपुर, सर्लाही, स्याङ्जा, जाजरकोट, झापा, महोत्तरी, तनहुँ, रुकुम–पश्चिम, इलाम, लमजुङ र गोर्खा भने न्यून जोखिममा छन्।

विशेष बुलेटिनमा भनिएको छ- तसर्थ वर्षाका कारण भूक्षय, बाढी, पहिरो तथा गेग्रान बहावको जोखिम रहेको र मनसुनमा रातिको समयमा पानी पर्ने सम्भावना बढी हुने गरेकाले सहरी तथा तराई क्षेत्रमा डुबानको जोखिम रहेको, ठूला तथा साना नदीनाला र खोलामा पानीको सतह बढ्नसक्ने, दैनिक जनजीवन, कृषि, स्वास्थ्य, पर्यटन, सडक तथा हवाई यातायात समेत प्रभावित हुनसक्ने भएकाले आवश्यक सतर्कता तथा पूर्वतयारी अपनाउन हुन सर्वसाधारण तथा सबै सरोकारवाला निकायमा अनुरोध छ।