सिके गुप्तार कान्ति कुमारी बीच २०७५ वैशाख १४ मा विहे भएको थियो । त्यो बेला कान्ति कुमारीका बुवा प्रेम चन्द्र गुप्ताले हेलिकोप्टर चार्टर्ड गरेर छोरी ज्वाइँलाई विदाई गरेका थिए ।

तर ५ बर्षमै उनै कान्तिकुमारीलाई सिकेले मानसिक तनाव दिएर घरबाट ‘निकालेको’ भन्दै आयोगमा उजुरी परेको हो । कान्तिकुमारीका बुवा प्रेम चन्द्र गुप्ताले अहिले आफूहरूका लागि ज्वाइँको घरको ढोका बन्द भएको बताए ।

प्रेमचन्द्रकी साहिली छोरी ३४ वर्षीया कान्तिकुमारीले अनलाइनमार्फत आयोगमा गरेको उजुरीमा लामो समय शारीरिक र मानसिक हिंसा सहनुपरेको उल्लेख छ । निरन्तरको हिंसा सहन नसकेर दुई सन्तानसहित अहिले माइतीमा बसिरहेको उनले बताइन ।

गत कात्तिक १४ गते बुबालाई साथमा लिएर लुम्बिनीस्थित पतिको घर गएको बताउँदै उनले भनिन, ‘घर पुग्नेबित्तिकै सासू र नन्दले हातपात गरे । घरबाहिर रहेका उहाँ (पति) लाई बुबाले फोन गर्दा तपाईंकी छोरीका लागि मेरो घरको ढोका बन्द भइसकेकाले डिभोर्स गर्ने बताउनुभयो ।’
बुबासित त्यसो भनेपछि तनावमा थपिएको उनले बताइन ।

बिहीबार आयोगमा पठाइएको निवेदनमा पालनपोषण र शिक्षादीक्षाको साटो कुटपिट र हिंसा गरिएको उल्लेख छ । निवेदनको अन्तिम निर्णय नभएसम्म आफ्नै घरमा बसोबास व्यवस्था, खाने–लाउने व्यवस्था, कुटपिट हिंसा नगर्ने, शिष्ट र सभ्य व्यवहारका साथै गाली र अपशब्द प्रयोग गर्न नपाइने आदेश गरेर बाँच्न पाउने अधिकारको संरक्षण गर्न माग गरिएको छ ।

लुम्बिनी प्रदेशका सामाजिक विकासमन्त्री गुप्ताले कुनै पनि पारिवारिक समस्या नरहेको तर ‘म्याडम’ रिसाएर माइत गएको बताए । ‘हामी दुवै जनालाई अगाडि राखेर कुरा गर्नेबित्तिकै सत्य कुरा थाहा भइहाल्छ’ गुप्ताले भने, ‘मैले पैसा मागेको र दुःख दिएको गलत हो ।’
घरमा आमाबुबा भएकाले झगडा हुने क्रममा रिसाएर माइत गएको उनले दाबी गरे । रिसाएका बेला मुखबाट त्यस्ता कुरा निस्किएका हुन सक्ने उनको भनाइ छ । ‘मैले उहाँलाई छाडेको छैन,’ उनले भने, ‘यो सब कुरा झूट हो ।’ माइतबाट पत्नी र छोराछोरी ल्याउन शुक्रबार बिहान गाडी पठाएको उनले बताए ।
कान्तिपुरबाट साभार