कामप्रति चासो दिन छोडेका भीमले एक महिनाअघि कृष्ण कँडेलको इन्द्रेणी कार्यक्रममा गएर एउटा गीत रेकर्ड गराएका थिए। भीमको मृत्युको खबरपछि स्याङजा पुगेका कँडेलले दोहोरी क्षेत्रले अर्को क्षमतावान गायक गुमाएको बताए।

भीमका भिनाजु राजन खत्रीले उनी २ महिनादेखि बिरामी परेको बताएका छन्। राजन भन्छन् ‘२ महिनादेखि राम्रोसँग नखाने, एकोहोरो हुने जस्ता उनको त्यो शैलीले परिवार निकै चिन्तित थिए। त्यही लक्षणका कारण उनले आज परिवारलाई चिन्तामै छोडेर गए।’

२०४१ सालमा स्याङजाको पुतली बजारमा जन्मिएका भीमले २ वर्षको उमेरमा बुवा गुमाएका थिए। उनकी आमा अहिले ७८ वर्षकी भइन्। उनका ५ जना दाजु र ४ जना दिदी छन्। उनी परिवारको कान्छो छोरा थिए।

सानैबाट गायनको सपना देख्ने भीमले करिअरको सुरुवात गीत रेकर्डिङबाट गरेका थिए। तर रेकर्डेड गीत उनका लागि खासै फलदायी भएन। लाइभ दोहोरीको क्रेज बढेसँगै उनी पनि लाइभ दोहोरीमा लागे। उनी एक समय लाइभ दोहोरीमा सबैभन्दा सुनिने र खोजिने कलाकारमा पर्थे।

तर केही समय अघिबाटै उनले दोहोरीमा चासो दिन छाडेका थिए। कुनैदिन कामको अफर कुरेर बस्ने भीम बिस्तारै पाएको काम पनि गर्न छोडे।

‘उनले गीत गाउन आएका अफर आफूलाई सन्चो छैन भन्दै टार्ने गर्थे’ उनीसँगै थुप्रै दोहोरीमा स्वर मिसाएका गायक रबिन लामिछानेले सुनाए।

भीम र रबिन निक्कै मिल्ने साथी हुन्। उनीहरुले थुप्रै गीत पनि सँगै गाएका छन्। भीमको अन्तिम संस्कारका लागि पोखरा पुगेका रबिनले आफूलाई पनि साथीले केहि कुरा शेयर नगरी गएको बताए।

उनले गला अवरुद्ध पार्दै भने, ‘उहाँ पहिला पनि आफ्ना व्यक्तिगत कुरा त्यति भन्नु हुन्नथियो। अहिले डिप्रेसन भएको थियो भन्ने कुरा बाहिर आइरहेको छ। तर दुई महिना अघिसम्म भेट्दा पनि उहाँको हाउभाउ हेरेर त्यस्तो लाग्दैनथ्यो। अब मनमा के थियो कहिल्यै भन्नु भएन।’

रबिन दुई महिनादेखि भीमसँग कन्ट्याक नभएको बताउँछन्। केही दिनअघि मात्रै बिरामी छन् भन्ने थाहा पाएर उनले फोन, म्यासेज गरेको तर कुनै रेस्पोन्स नआएको बताए।

काम विशेषले मुस्ताङ पुगेका रबिन भीमको मृत्युको खबर पाएसँगै पोखरा आएर उनको अन्त्येष्टिमा सरिक भएका छन्। भीमको आजै पोखराको राम घाटमा अन्तिम संस्कार गरिएको छ।

राष्ट्रिय लोक तथा दोहोरी गीत प्रतिष्ठान नेपालका अध्यक्ष रमेश बिजीले भीमको निधनले नेपाली लोकदोहोरी क्षेत्रमा ठूलो क्षति पुगेको बताए।

बिजी भन्छन्, ‘उनी लामो समयदेखि लोकदोहोरीमा सक्रिय थिए। दोहोरी प्रतियोगिताबाट गायनमा प्रवेश गरेका भाइ हुन्। उनले प्रतिस्पर्धा गरेका थुप्रै प्रतियोगितामा म नै निर्णायक थिएँ। राम्रो प्रतिभा भएको मान्छे हो। भीम शालीन स्वभावको प्रतिभावान गायक हुन्। उनको निधन समग्र लोकदोहोरी क्षेत्रकै लागि अपूरणीय क्षति हो।’