पहाडका गाउं रित्तिदै गइरहेपनि पहाडी जिल्लामा विमानस्थल बनाउने होड भने चलेको छ ।

राजनीतिक दलका नेताहरुले आफ्नो स्वार्थका लागि कुनै योजना विना विमानस्थल बनाउने चर्का नारा लगाउने र आफु निर्वाचित भएपछि स्वार्थ पुर्ति गर्न विमानस्थल बनाउने कार्यले पहाडमा बनिरहेका विमानस्थल आवश्यकता र राजनीतिक स्वार्थ भन्ने प्रश्न उठ्न थालेको छ ।

निर्माण शुरू भएको झण्डै १७ वर्षपछि गत पुस अन्तिम हप्ता गुल्मीको सिमीचौरस्थित रेसुङगा विमानस्थलमा परिक्षण उडान भएको छ । तर यो विमानस्थलबाट नियमित उडान हुनेमा भने शंका छ ।

किनकी विमानस्थल हुंदै काठमाडौं पुग्ने जमात कम हुंदा विमानस्थल सञ्चालनको खर्च समेत नउठ्ने पनि हुन सक्छ ।

दाङमा पनि विमानस्थल छ । ७ अर्ब रूपैयांभन्दा बढी खर्चेर बनेको दाङको टरीगाउं विमानस्थल नियमित सञ्चालनमा छैन । २०१० सालमै पहिलो जहाज अवतरण गरेपछि अहिले त्यहांबाट उडान हुन सकेको छैन् ।

नेपाल आयल निगम टरीगाउँ विमानस्थलमा ६० हजार लिटर क्षमताको हवाई इन्धन रिफ्युलर सेन्टर सञ्चालनमा आएको छ । अर्घाखांचीको अर्घा भगवती विमानस्थल पनि निर्माणको क्रममा छ ।

अहिलेसम्म ३० करोडभन्दा बढी लगानी भइसकेको विमानस्थल आवश्यकता हो वा राजनीतिक स्वार्थ केही बुझ्न सकिएको छैन् ।
सन्धिखर्क नगरपालिकाका प्रमुख कृष्णकुमार श्रेष्ठ विमानस्थल चल्ने नसक्ने बताए ।

उनले गुल्मी विमानस्थल, अर्घाखांची, प्यूठानमा विमानस्थल बनाएर नचल्ने बरु सडकको स्तरउन्नतीमा राजनीतिक दलले ध्यान दिनुपर्ने बताए । । प्युठानको स्वर्गद्वारी नगरपालिका–८ सल्लेटारमा स्वर्गद्वारी विमानस्थल निर्माण गर्ने प्रक्रिया अगाडि बढाइएको छ । १२ जिल्ला रहेको लुम्बिनीमा २ वटा विमानस्थल मात्र व्यवस्थित रूपमा चलेका छन ।

नेपालगञ्ज विमानस्थल र भैरहवास्थित गौतमबुद्ध अन्तर्राष्ट्रिय विमानस्थल चलेका छन । पछिल्लो समय पाल्पा, रोल्पा र रुकुमपूर्वमा पनि विमानस्थल बनाउने कुरा बेलाबेला चर्चामा आउने गर्छ ।