४० वर्षदेखि फिल्म क्षेत्रमा नृत्य निर्देशकको भूमिकामा योगदान दिएका कमल राई पहिलो पटक म्यूजिक भिडियो सुटिङ गर्ने भएका छन । नेपालसहित अन्य विभिन्न देशका पाँच सय बढी फिल्ममा काम गरेको अनुभव बटुलेका राई म्यूजिक भिडियोमा पहिलोपटक निर्देशन गर्न लागेका हुन् ।

बुटवलमा बुधबार पत्रकार सम्मेलनमा पहिलोपटक म्युजिक भिडियोमा निर्देशन गर्न लागेको खुलासा गरे । ‘यो मेरो पहिलो म्यूजिक भिडियो हो ।’– उनले भने । स्वतन्त्र नागरिक समूह नेपालको अगुवाईमा बन्न लागेको देशभक्त गित ‘नेपालको जय होस’ सुटिङका लागि उनी एक हप्तादेखि बुटवलमा छन् । बुटवलबाट धेरै प्रतिभाशाली कलाकारको जन्म भएको दाबी गर्दै उनले यसमा स्थानीय कलाकारलाई जोड दिएको बताए ।

रुपन्देहीका चारवटा विद्यालयका दुई दर्जन बढी विद्यार्थीहरुलाई कोरस डान्सको लागि एक हप्तादेखि तयारी गरिरहेको उनले बताए । सुटिङमा भने प्रविधि र प्राविधिकको टिम काठमाडौबाट झिकाईएको उनले बताए । एउटा फिल्म र म्यूजिक भिडियोको फरकका बारेमा अनुभव सुनाउँदै उनले फिल्म लामो समय र ठूलो कलाकारको टिम सहभागी हुने तथा म्यूजिक भिडियो छोटो र सन्देश दिने खालको धेरै मेहनत लाग्ने बताए ।

फिल्म सुटिङ गर्ने क्यामराबाट नै पहिलोपटक म्यूजिक भिडियो सुटिङ गर्न लागेको उनले बताए । धेरै पारिवारिक र सन्देशमूलक फिल्म बनाएका निर्देशक शिव ढकालले म्यूजिक भिडियो निर्देशन गर्दै छन । ‘नयाँ पुस्तामा अनुशासन र माटोप्रतिको माया देखिदैन ।’–उनले भने । बालबालिकाहरुलाई सन्देश दिने रुपमा म्यूजिक भिडियो निर्माण गर्न लागेको उनले बताए । नेपाल प्राकृतिक रुपमा नै एउटा फिल्मका लागि उपयुक्त स्थल भएको दाबी गर्दै उनले यो थलोलाई संरक्षणका साथै प्रचारप्रसार गर्न जरुरी रहेको बताए ।

६ मिनेट २० सेकेन्ड लामो गितको सुटिङ नयाँगाउस्थित मुक्तिनाथ धाममा पुस १५ गते शुभमुहर्त गरिने स्वतन्त्र नागरिक समूह नेपालको अध्यक्ष विश्वराज गैरेले बताए । चार दिनसम्म चल्ने सुटिङ लुम्बिनी, मणिग्राम लगायत पर्यटकिय क्षेत्रहरुमा हुने उनले बताए ।
नया पुस्तालाई अनुशासन र देश माया दर्शाउने म्यूजिक भिडियो बनाउन लागेको समूहका अध्यक्ष विश्वराज गैरेले बताए । सबैको मन छुन खालको गित बनेको उनले बताए ।
निर्देशक ढकाल ब्यवसायभन्दा माथि उठेर सोच्ने बेला आएको बताउँछन् । धेरै ब्यावसायिक फिल्म बनाएका उनी पनि देशभक्त गितको छायाँकन काठमाडौ बाहिर गर्न पाउँदा खुशी लागेको बताए ।