लुम्बिनी प्रदेश सरकारले विद्युत् महशुल नबुझाउँदा प्रदेशसभा ४ घण्टा विद्युत्विहीन हुन पुग्यो । मुख्यमन्त्री तथा मन्त्रिपरिषद् कार्यालयले विद्युत् महशुल नबुझाउँदा सोमवार ४ घण्टा विद्युत् कटौती भएको हो ।
सोमवारको बैठक बस्नुअघि विद्युत् प्राधिकरणले प्रदेशसभा भवनको विद्युत् काटेको थियो । १ बजे प्रदेशसभा बैठक बस्ने सूचना थियो ।
विद्युत् काटिएका कारण बैठक ४५ मिनेट ढिलो बसेको थियो । नेपाल विद्युत् प्राधिकरण लमही शाखाले प्रदेश सरकारले विद्युत् महशुल नबुझाएको भन्दै लाइन काटेको थियो । सोमवार विद्युत् काटिएको विषयले प्रदेशसभा बैठकमा प्रवेश पाएको छ ।
प्रदेशसभा सदस्य दिपेन्द्र पुनले विद्युत् काटिएका कारण अपमान भएको बताए । उनले सम्बोधनका क्रममा भने, ‘मानहानी गरेबापत मुख्यमन्त्रीले रोस्ट्रमबाटै माफी माग्नुपर्छ ।’
प्रदेश सरकार र प्रदेशसभा कसले विद्युत् महशुल तिर्ने विवाद भएपछि आफूले लाइन काटिदिएको नेपाल विद्युत् प्राधिकरण लमही वितरण केन्द्रका प्रमुख जगन्नाथ लामिछानेले बताए । कात्तिकदेखि विद्युत्को पैसा तिरेका थिएनन्, त्यही भएर लाइन काटिदिएको हो,’ लामिछानेले लोकान्तरसँग भने, ‘मंगलवार आएर मुख्यमन्त्री कार्यालयले बक्यौता ७ लाख ५३ हजार रुपैयाँ विद्युत महशुल बुझाएपछि विद्युत् जडान गरिएको छ ।’
प्रदेश राजधानी भित्रका सबै संरचनाको विद्युत् महशुल मुख्यमन्त्री तथा मन्त्रिपरिषद् कार्यालयले तिर्ने गरी मिटर नामसारी गरिएको छ । प्रदेशसभा बैठक चलिरहेकाले काटिएको विद्युत् समेत जडान गर्न विद्युत् प्राधिकरणलाई दबाब परेको देखिन्छ । १६० र ३०० केभीए ट्रान्सफर्मरबाट लाइन जडान भएको थियो ।
