उनले ओभरलोड बोकेर आउने भारतीय ट्रकलाई भन्सार विन्दुमै रोकेर भारमिलान गरी नेपाली ट्रकलाई सामान बोक्न दिनुपर्ने बताए । मुलुकभित्र नियम अनुसार नेपाली ट्रकले ढुवानी गर्न पाउनु पर्ने र आफूहरुका माग पूरा नभए निरन्तर आन्दोलन गर्ने उनले बताए । पाण्डेले भारतीय ट्रकले अधिक भार बोकेको बारे सुरक्षा निकायले ध्यान नदिएको आरोप लगाए । ‘धेरै भार बोक्ने ट्रकसित जरिवाना अशुलेर नियम विपरितको तौल घटाउन लगाउनु पर्छ,’ उनले भने, ‘तर, यहाँ जरिवाना अशुलेर अधिक भार बोक्न दिने गरिएको छ ।’

पेट्रोलियम पदार्थको मूल्य बृद्धिका कारण मारमा परेका व्यवसायी भारतीय ट्रकको मनपरिले झन धरासायी बनेको बताए । ‘हाम्रा ट्रकदेखि तिनमा प्रयोग हुने इन्धन, टायर, पार्टस लगायत बस्तु् भारतबाटै आयात गरिन्छ,’ उनले भने, ‘यी बस्तुमा अत्यधिक भन्सार महशुल लगाइएको छ । जसले गर्दा हामी भारतीय ट्रकसित प्रतिष्पर्धा गर्न सक्दैनौं ।’ त्यसैले मुलुकमा भारतीय ट्रकको निर्वाध आवागमन र अधिक भार बहन नियन्त्रण गर्न माग गरिरहेको उनले बताए ।

‘अधिक भार बहन सम्बन्धमा नेपाली ट्रकलाई कडाइ गरिन्छ,’ उनले भने, ‘तर, भारतीय ट्रकको हकमा आँखा चिम्लिने गर्दा समस्या भएको हो ।’ राज्यलाई सघाउने उद्देश्यले आन्दोलन गर्नु परेको उनले बताए । भारतीय ट्रकले नियमले तोकेको भन्दा तेब्बर तौल बोकर मुलुकभरि ढुवानी गररहेको जनाउँदैं ट्रक यातायात व्यवसायीका संस्थाले अब निरन्तर आन्दोलन गर्ने चेतावनी दिएका छन् ।

महासंघका राष्ट्रिय बरिष्ठ उपाध्यक्ष लोकराज पोखरेलले अधिक भार बहन र भारतीय ट्रकको मनपरि बारे वर्षौदेखि सुनुवाई नहनु दुःखद् भएको बताए । ‘नेपाली व्यवसायी अत्यन्तै गम्भीर अवस्थामा रहेका छन,’ उनले भने, ‘प्रत्येक वर्ष यही विषयमा ध्यानाकर्षण गराउनु परिरहेको छ । यो भन्दा दुःखको कुरा के हुन्छ ।’ नेपाली प्रशासन र सरकार यस बिषयमा जानकारी भए पनि माग पूरा गर्न गम्भीर नदेखिएको उनले बताए ।

‘अहिले हामीले बिरोध सभा गरेर माग सुनुवाईका लागि दबाब दिएका हौं,’ उनले भने, ‘तत्काल माग सुनुवाई नभए भारतीय ट्रक रोक्ने र हाम्रा ट्रक भन्सारमा खडा गर्ने चेतावनी दिन्छु ।’ कोरोना महामारीबाट थलिएका व्यावसायीलाई बैंकको ताकेताले अत्याइरहेको अवस्थामा राज्यबाट राहत उपलब्ध गराउने कार्यक्रम नहुनु चिन्ताको विषय भएको बताए । ‘एकातिर व्यवसाय चलाउनै कठिन छ,’ उनले भने, ‘अर्कातर्फ बैंकको किस्ता बुझाउने ताकेताले व्यवसायीको मनोदशा विक्षिप्त बनेको छ ।’ व्यवसायीका अनुसार भारतीय ३० टन बोक्ने क्षमताका ट्रकले ९० टनसम्म सामान बोकेर नेपाल आउँछन् ।

यसरी अधिक ओभरलोड बोकेर आउने भारतीय ट्रकलाई सीमामै रोकेर भारमिलान गर्नुपर्छ । तर जरिवाना गरी निर्वाध नेपालभर जान दिइन्छ । यसले एकातर्फ नेपालका सडकलगायतका संरचना भत्किने, भाँसिने समस्या बढिरहेको छ भने नेपाली ट्रक व्यवसायी मारमा छन् । ‘भारतीय ट्रकले ओभरलोड नबोक्ने हो भने, नेपाली ट्रकहरु खाली बस्नै पर्दैन, भार मिलान हुँदावित्तिकै हाम्रा ट्रकले काम पाउँछन्’, संयोजक पाण्डेले भने ।

शुक्रबार रुपन्देहीको बेलहिया नाकामा प्रदर्शन गरेका व्यवसायीले आफूहरु चल्नै नसक्ने अवस्था आएकाले बाध्य भएर आन्दोलनमा उत्रिनु परेको बताए । सरकारले आफूहरुका माग सुनुवाई नगरे कति व्यवसायी आत्महत्या गर्ने अवस्थामा पुगेको महासंघले दावी गरेको छ । बेलहिया नजिकै बाइपासमा रहेको ट्रक पार्किङ स्थलबाट नाराबाजी गर्दै व्यवसायीले भन्सार कार्यालयको गेटमा पुगेर बिरोध सभा गरेको थिए । कानुन विपरित भारतीय ट्रकले गरिरहेको अधिक भारबहनले नेपाली व्यवसायी मर्कामा परेको उल्लेख गर्दै उनीहरुले नियन्त्रणका लागि दबाब दिएका छन् ।

ट्रक व्यवसायी महासंघ लुम्बिनी प्रदेशको आयोजनामा भएको बिरोध प्रदर्शनमा यातायात मजदुर संघका साथै आधा दर्जन व्यवसायिक संस्थाका प्रतिनिधि सहभागी थिए । महासंघले भारतीय ट्रकले भन्सार बिन्दुसम्म ओसारेका समान नेपाली ट्रकले ढुवानी गर्न पाउने व्यवस्था मिलाउन माग गर्दै मंसिर दोस्रो साता भन्सार कार्यालयमा ज्ञापनपत्र बुझाएको थिए ।