पञ्चकन्या समूहका अनुसार प्राधिकरणले ट्रंकलाइन महशुल वक्यौंता बिबाद देखाएर कार्तिक ७ गते लाइन काटेपछि दुबै उद्योग बन्द थिए । यस अवधिमा उद्योगभित्र आश्रित दुई सय कर्मचारी र उनीहरुका परिवारका लागि जेनेरेटर चलाएर पिउने पानी र बिजुली आपूर्ति गरिएको उनले बताए । उद्योग बन्द भए पनि एक जना कामदारलाई पनि सेवाबाट विमुख नगरिएको उनले बताए ।

‘उद्योग बन्द भएका बेलाको खर्च बक्यौंता महशुलभन्दा धेरै रहेको छ,’ उनले भने, ‘महशुल नतिर्ने हाम्रो नियत होइन, हामी त न्यायका लागि लडाईमा छौं । अन्नायपूर्वक माग नै नगरिएको ट्रंकलाइनको महशुल हामीले किन तिर्ने ।’ अहिले धरौंटी वापत पहिलो किस्ता बुझाएको जनाउँदैं आगामी दिनमा न्याय प्राप्तिका लागि विद्युत नियमन आोगदेखि अदालतको ढोकासम्म पुग्ने जानकारी दिए ।

‘न्यायिक उपचार खोज्ने पक्रियालाई सँगसँगै लैजाँदै हाललाई विवादित बनाइएको बक्यौंताको किस्ता रकम तिर्ने निर्णय गर्नुपर्ने बाध्यात्मक अवस्थामा पुगेका छौं,’ महाप्रवन्धक साहुले भने, ‘पञ्चकन्या समूहसित जोडिएका श्रमिकको रोजीरोटी सुरक्षित गदैं यहाँबाट सामान अर्डर गरेका राष्ट्रिय गौरबका आयोजनाका माग पूर्ति गर्न उद्योग सञ्चालनमा ल्याउने निर्णय गरेका छौं ।’

पञ्चकन्यासँगैं बुटवल–भैरहवा कोरिडोरमा रहेका घराना फुड्स, सिद्धार्थ पेटप्लान्ट र श्याम प्लास्टिकले सोमबार नेपाल उद्योग वाणिज्य महासंघको पहलमा धरौटी रकम तिरेका हुन । भैरहवास्थित घराना फुड्सले एकसाताअघि धरौंटीको पहिलो किस्ता बुझाइसकेको छ । उत्पादन बिदेश निर्यात हुने भएकाले अर्डर अनुसार आपूर्ति गर्न आफूले किस्ता बुझाएको घराना फुड्सका सञ्चालक बिकास गोयन्काले बताए । माग बिना नै डेडिकेडेट फिडर र ट्रंकलाइन जडान गरिएको भन्दैं गत साता सिद्धार्थ उद्योग वाणिज्य संघको अगुवाईमा सडक प्रदर्शन गरिएको थियो ।

पंचकन्यासँगै सिद्धार्थ पेटप्लान्ट र श्याम प्लास्टिकले पनि सोमबार बक्यौताको पहिलो किस्ता तिरेका हुन् । पहिलो किस्ता तिरेपछि प्राधिकरणले उद्योगहरु विद्युत जोडिदिएको छ । यसअघि यी उद्योगमा प्राधिकरणले किस्ता नतिरेको भन्दै लाइन काटिदिएको थियो ।

पंचकन्या समूहले पत्रकार सम्मेलन गरेर कानूनी प्रक्रियामा जाने तर लामो समय उद्योग नचलाई राख्न नसकिने भएकाले बाध्यताले प्रयोग नै नगरेको बक्यौता रकम तिरेको जनाएको छ । समूहका महाप्रबन्धकसाहुले उद्योगले माग नै नगरेको, प्राधिकरणले महशुलको विल समेत दिन नसकेको अवस्थामा आफूहरु अन्यायमा परेको बताए ।

‘हामीले प्राधिकरणले ट्रंकलाइन प्रयोग गरेको भनेर दावी गरेको समयमा नियमित विद्युत महशुल तिरेका थियौं तर दुई वर्षपछि तिमिहरुको बक्यौता बाँकी छ भनेर हामीलाई अन्याए गरियो’, उनले भने । उद्योगहरुले २०७२ माघदेखि २०७५ वैशाखसम्ममा डेडिकेटेड तथा ट्रङ्कलाइन प्रयोग बापत महशुल बक्यौता भन्दै प्राधिकरणले उद्योगहरुलाई ताकेता गरेको थियो ।

पञ्चकन्या प्लाष्टिकको २४ लाख ६३ हजार, पञ्जकन्या स्टीलको ५२ लाख १९ हजार, सिद्धार्थ पेटप्लान्टको १ करोड ८३ लाख र श्याम प्लास्टिकको ४९ लाख १० हजार रुपैर्या बक्यौता रहेको प्राधिकरणले जनाएको छ । बक्यौतालाई २८ किस्तामा विभाजन गरी उद्योगहरुले पहिलो किस्ता तिरेका छन् ।