बुटवल । बुटवल-१५ सेमलारस्थित सिद्धि गणेश भद्रकाली बहुउद्देश्यीय सहकारी संस्था लिमिटेडले मंगलबार निःशुल्क मृगौला रोग परीक्षण तथा औषधि वितरण कार्यक्रम सम्पन्न गरेको छ ।
नेपालमा पछिल्लो समय बढ्दो मृगौला सम्बन्धी समस्याको समयमै पहिचान गरी रोकथाम गर्न सकियोस् भन्ने उद्देश्यसहित सहकारीले आफ्नै प्रधान कार्यालयमा स्वास्थ्य शिविर सञ्चालन गरेको हो ।
नेपाल किड्नी फाउन्डेसनको सहकार्यमा आयोजित उक्त शिविरमा सहकारीका सदस्य तथा सर्वसाधारण गरी ३०० भन्दा बढी व्यक्तिको मृगौला परीक्षण र औषधि वितरण गरिएको सहकारी अध्यक्ष कृष्णप्रसाद भुसालले जानकारी दिए ।
शिविरमा डा. शक्ति बस्नेतसहित नेपाल र विदेशका १५ जना विज्ञ चिकित्सक र स्वास्थ्यकर्मीको टोलीले अत्याधुनिक प्रविधिबाट रगत, पिसाब र क्रिटिनाइन परीक्षण गरी तुरुन्तै रिपोर्ट प्रदान गरेको सहकारीकी उपाध्यक्ष गीता भण्डारीले बताइन् ।
डा. बस्नेतका अनुसार मृगौला ८० प्रतिशतसम्म क्षति भएपछि मात्र लक्षण देखिने भएकाले ४० वर्ष उमेर कटेका सबै नागरिकले हरेक वर्ष मृगौला परीक्षण गर्न आवश्यक रहेको छ ।
२०५६ सालमा स्थापना भएको सहकारीले सामाजिक उत्तरदायित्वअन्तर्गत विभिन्न स्वास्थ्य तथा सामाजिक अभियान सञ्चालन गर्दै आएको छ । सहकारीमा हाल ६ हजार ११८ शेयर सदस्य रहेका छन् र यसका ६ शाखा कार्यालय सञ्चालनमा छन् ।
शिविरमा सहभागी डम्बर भण्डारीले छिटो र सहज स्वास्थ्य परीक्षण सेवा पाएको भन्दै सहकारीप्रति धन्यवाद ज्ञापन गरे । उनले यस्ता शिविर नियमितरूपमा सञ्चालन गर्नुपर्नेमा जोड दिए ।
यसैबीच, नेपाल किड्नी फाउन्डेसनले सेमलारसहित रुपन्देहीका चार स्थानमा मृगौला स्वास्थ्य शिविर सञ्चालन गर्ने योजना बनाएको छ । फाउन्डेसनका अध्यक्ष डा. बस्नेतका अनुसार बुटवल, लुम्बिनी र छपियामा समेत शिविर आयोजना हुनेछ ।
फाउन्डेसनले चारै शिविरमार्फत १ हजार २०० जनालाई सेवा पुर्याउने लक्ष्य राखेको छ । उनका अनुसार फाउन्डेसनले पछिल्ला दश वर्षमा ३० हजारभन्दा बढी व्यक्तिको मृगौला परीक्षण गरिसकेको छ ।
