बुटवल । प्रसुती तथा स्त्रीरोग विशेषज्ञ डा. शिला क्षेत्री कार्यरत बरदान क्लिनिक दर्ता विनानै सञ्चालन भएको पाइएपछि अनुगमन टोलीले ताला लगाइदिएको छ ।
डा. शिला क्षेत्री बुटवलमा प्रसुती तथा स्त्रीरोग क्षेत्रमा कहलिएको नाम हो । उनीबाट सेवा लिन २/३ दिन अगाडि नै नाम लेखाउनुपर्छ । जिल्ला प्रशासन कार्यालय रुपन्देहीको अनुगमन टोलीले अनुगमन गर्दा क्लिनिक दर्ता नभई सञ्चालन भएको भेटिएपछि ताला लगाएको हो । फार्मेसी भने खुल्ला छ ।
रुपन्देहीका सहयाक प्रमुख जिल्ला अधिकारी चिरन्जिवि रानाले बरदान क्लिनिक प्रा.लिको ओपीडि, ल्याव, भिडियो एक्सरे बन्द गराइएको बताए । ‘दर्ता विना नै सञ्चालन भएको भेटिएपछि ताला लगाएका छौ । आवश्यक दर्ता प्रक्रिया पुरा गरेर आएपछि मात्र ताला खुल्नेछ’ उनले भने । बरदान क्लिनिकका सञ्चालक डा. मिलन अधिकारी हुन । लामो समय देखि बुटवलमा निःसन्तानहरुका लागि बरदानले सेवा दिदै आएको भएपनि दर्ता विना नै सञ्चालनमा रहेको भेटिएपछि क्लिनिकमा ताला लागेको हो ।
बरदान सहित बुटवलमा विहिबार गरिएको अनुगमनमा ६ वटा क्लिनिकहरु दर्ता विना सञ्चालनमा रहेको भेटिएपछि अनुगमन टोलीले बन्द गराएको थियो । त्यस्तै बुटवल डेण्टल प्रा.लि पनि दर्ता विना नै सञ्चालन भएको भन्दै अनुगमन टोलीले बन्द गराएको छ ।
