गत वर्षको असोजमा पुरानो ठेकेदार कञ्चनजङ्घा बिरुवा जेरी काठमाडौँसँग सम्झौता तोडेर सडक विभागले नयाँ ठेकेदार बाबुल दर्शन मालिका जेभीलाई निर्माणको जिम्मेवारी दिएको थियो । तर यसले पनि तोकिएको समयमा काम पूरा गर्न सक्ने सम्भावना न्यून बन्दै गएको छ ।

नयाँ ठेकेदारबाट अपेक्षाकृत काम हुन नसको डिभिजन सडक कार्यालय बुटवलले जनाएको छ । कार्यालय बुटवलका सूचना अधिकारी इन्जिनियर महेश्वर लम्सालले हालसम्म जम्मा २५ प्रतिशत भौतिक प्रगति भएको र रकम पनि डेढ करोड मात्रै लगेको रातोपाटीलाई बताए । ‘सुरुमा जति हल्ला गरिएको थियो, त्योअनुसार ठेकेदारले पछिल्लो समय जाँगर देखाएको छैन,’ उनले भने, ‘असोजसम्म सम्पन्न हुने सम्भावना न्यून छ ।

एक वर्षभित्र काम सक्ने गरी बुटवलको चौराहादेखि गोल पार्कसम्मको ३ दशमलव २५ किलोमिटर सडक ६ लेनमा विस्तार गर्न भ्याटसहित ३३ करोडमा ठेक्का लगाइएको थियो ।

यो सडक लामो समयदेखि निर्माणको नाममा भत्काउने तथा निर्माण सामग्री अलपत्रजस्तै राखिने गर्दा बुटवलवासीले हैरानी खेप्दै आएपछि बुटवल उपमहानगरपालिका मेयर खेलराज पाण्डेयले पनि चासो देखाएका थिए ।

संघीय सरकारको बजेटले निर्माण भए पनि समयमा सडक नबन्दा नगरवासीले कष्ट बेहोर्नुपरेकाले विभिन्न निकायमा यसबारे ध्यानाकर्षण गराएको उनले बताए ।

बुटवल उद्योग वाणिज्य संघका अध्यक्ष हरिप्रसाद अर्यालले नयाँ ठेकेदारबाट समयमा काम हुने अपेक्षा स्थानीयले गरेकाले यसलाई निरन्तरता दिने काम भने सडक कार्यालयको भएको बताए । र जतिसक्दो छिटो सम्पन्न गर्न सम्बन्धित निकायमा दबाब दिने बताए ।

किन पूरा हुन सकेन ?

बुटवल–बेहिलया व्यापारिक मार्गअन्तर्गत भैरहवाको सुनौलीदेखि बुटवलको चिडिया खोलासम्म सडक विस्तार परियोजना सुरु गरिएको हो ।

जसअन्तर्गत बुटवल–बेलियादेखि–चिडिया खोलासम्म पर्ने ६ लेन सडक अहिले चौराहासम्म निर्माण सम्पन्न भइसकेको छ । अन्यत्र काम सकिए पनि बुटवलमा सुरुमा घरधनीहरूले मुद्दा मामिला गर्दा केही वर्ष रोकिएको थियो । अहिले सुनौलीमा ८ सय मिटर सडक बन्न मात्रै बाँकी रहेको सडक कार्यालय बुटवलले जनाएको छ ।

यता बुटवलको चौराहादेखि चिडिया खोलासम्म तीन किलोमिटर सडक निर्माण भने वर्षौँदेखि रोकिएपछि स्थानीयले सास्ती बेहोर्दै आएका छन् ।

यहाँ फुटपाथ तीन मिटर, सर्भिस लेन सात मिटर, ग्रीनबेल्टका साथै स्टल साढे दुई मिटर र मुख्य लेन साढे १० मिटरको हुने छ । सडकमै नाइट स्टल राख्न मिल्नेगरी पनि बनाउने योजनाअन्तर्गत काम सुरु भएको छ ।

निर्माणअन्तर्गत चौराहादेखि मिलन चोक ट्राफिकचोकलगायत ठाउँमा फराकिलो बनाएर साना ढुंगा राख्ने काम गरिएको छ । वेला वेला विभिन्न ठाउँमा काम पनि गरिएको देखिएको छ ।

सडक निर्माणमा ढिलाइ हुनुमा बजेट अभाव, नदीजन्य वस्तु नपाएको ठेकेदार कम्पनीको गुनासो छ । स्थानीय तहहरूले नदीजन्य वस्तुको ठेक्का प्रायः जेठ महिनापछि खुलाउने हुँदा समस्यामा परेको गर्दछन्।

अहिले बुटवल आसपासमा नदीजन्य वस्तु अभाव भएको ठेकेदारको भनाइ छ । सडक कार्यालय सूचना अधिकारी इन्जिनियर महेश्वर लम्सालले कार्यालयमा बजेट नभएको कारण ठेकेदारलाई आवश्यक रकम प्रदान गर्न नसकिएको पनि बताए ।

उनले भने, ‘एक त निर्माण कम्पनीको इच्छाशक्ति कम, अर्कोतिर कार्यालयको बजेट अभाव नै हो ।’ हालसम्म ठेकेदार कम्पनीले डेढ करोड रुपैयाँ लगेको छ । उतातिर सुनौलीको ८ सय मिटर ठेक्का सोही कम्पनी भएको उल्लेख गर्दै त्यतातिर पनि ६ करोड ठेक्कामा ३ करोड ५० लाख रुपैयाँ ठेकेदार कम्पनीले लगेको बताए । सडक कार्यालयमा चालु आर्थिक वर्षको बजेट करिब सकिएको छ ।