बुटवल रामनगरमा निर्माण सम्पन्न भई सञ्चालनमा आएको अत्याधुनिक पशु बधशालाबाट मात्र खसी, बोकालाई बध गर्नुपर्ने नियमको पूर्ण कार्यान्वयन गर्न अनुगमन समितिले व्यवसायीलाई बारम्बार ताकेता गरेपछि व्यवसायीहरुले मासु पसल नै बन्द गरेका हुन । व्यवसायीहरुले बधशालामा बध गरेको खसी, बोकाको मासु विक्रि नगरेको भन्दै पहिलो चरणमा १० हजार जरिवाना गरेको थियो ।

त्यसपछि दोस्रो चरणमा अनुगमन जांदा अधिकांश खसी, बोकाको मासु विक्रि गर्ने पसल व्यवसायीले बन्द गरेका छन् । बुटवलमा ७ दिन देखि मासु पसलमा निरन्तर अनुगमन भइरहेको छ । बुटवल उपमहानगरपालिकाका अनुगमन तथा मुल्याकंन शाखाका ठगिश्वर पोखरेलले बुटवलबासीलाई स्वच्छ मासु खुवाउने अभियान अन्तर्गत सञ्चालन भइरहेको बधशालामा व्यवसायीहरुले खसी, बोका बध गर्नुपर्ने अन्यथा पसल नै बन्द गरिने बताए ।

विहिबार अनुगमन समिति ७ वटा खसी, बोकाको मासु विक्रि गर्ने पसलमा अनुगमनका क्रममा पुगेको थियो । सो क्रममा सवै व्यवसायीहरुले पसलमा पसल बन्द गरेको जानाकारी सहित सूचना टांस गरेका थिए । बुटवल–८ का हलाल मासु तथा माछा पसल, ताहिर माछा मासु पसल, गैरे मासु पसल, बुटवल–७ को द हिमालय क्राउन बुचरी, बुटवल ४ को सोल्टी मासु पसल, बुटवल १० को न्यू रेहमान मासु पसल र रेहान मासु पसलमा अनुगमन टोली पुग्दा पसल बन्द गरेको सूचना व्यवसायीले टांस गरेका थिए । मुक्तिनाथ कृषि कम्पनीको सहायक कम्पनी मुक्तिनाथ लाइभस्टक बैंकले ठेक्का पाएको बधशालामा व्यवसायी तथा उपभोत्तालाई बजार मूल्य भन्दा सस्तो मुल्यमा स्वच्छकर मासु विक्रि गरिरहेको छ । बुटवलका ३ स्थानमा आउटलेट राखेर उसले मासु विक्रि गरेको छ ।

मुक्तिनाथ लाइभस्टक बैंकका अध्यक्ष उमेश कुमार आचार्यले चाडवाडको अवसर पारेर मासुको खपतलाई वृद्धि गर्न तथा मासु व्यवसायीहरुलाई प्रोत्साहन गर्ने नीति अघि सारिएको बताए । उनका अनुसार बधशालाबाट मासु व्यवसायीहरुले प्रतिकेजी रु. ८०० मा प्रशोधित मासु प्राप्त गर्न सक्नेछन् । त्यस्तै व्यवसायीहरुबाट प्राप्त खसीबोका प्रसोधनको लागि उपमहानगरपालिकाले तय गरेको दररेटमा समेत ३० प्रतिशत छुट गरेको र व्यवसायीहरुकोबाट निशुल्क खसीबोका संकलनको व्यवस्था समेत मिलाएको उनको भनाई छ ।

दैनिक १ हजार खसीबोका बध गर्ने क्षमता भएको यस आधुनिक बधशालामा दैनिक २५० देखि ३०० खसीबोका बध भएमा पनि बार्षिक करिव एक लाख खसीबोकाको आवश्यकता पर्दछ । उक्त बराबरको खसीबोकाको खरिद सुनिश्चितताको लागि ग्रामिण क्षेत्रका केही सहकारी तथा बाख्रा उत्पादकसँग यस कम्पनीले सम्झौता गरिराखेको उनले बताए ।