बुटवल । रुपन्देहीको तिलोत्तमा नगरपालिकामा रहेको राममणि बहुमुखी क्याम्पस सञ्चालनक समितिले ल्याएको नियमावली विवादित बनेको छ ।
क्याम्पस सञ्चालक समितिले क्याम्पसमा कार्यरत प्राध्यापक र कर्मचारीको २५ वर्षे सेवा अवधि ल्याएपछि नियमावली विवादित बनेको हो ।
सञ्चालक समितिले ल्याएको नियमावली प्रति प्रध्यापक, कर्मचारीहरु रुष्ट बनेका छन् । उनीहरुले कसैसंग पनि सल्लाह र सुझाव विना एकलौटी ढंगले नियमावली ल्याएको प्रध्यापकहरुको आरोप छ ।
पूर्वक्याम्पस प्रमुख तथा सहप्राध्यापक खगराज शर्माले क्याम्पस सञ्चालक समितिले गरेको निर्णय गैरकानूनी, अदुरदर्शी हुनुका साथै क्याम्पस प्रमुखको असक्षमताको उपज भएको बताए ।
क्याम्पस सञ्चालक समितिका अध्यक्ष ध्रुवकुमार धिताल, पूर्वअध्यक्ष तथा संरक्षक रोमणीप्रसाद पाठक र क्याम्पस प्रमुख ताराप्रसाद पराजुलीले बदनियत राखेर नियमावली ल्याएको आरोप प्रध्यापकहरुले लगाएका छन् । उनीहरुले यो नियमावली कार्यान्वयन हुन नहुने यदि भएमा संघर्षमा उत्रिने बताएका छन् ।
क्याम्पसले ल्याएकोको कार्यविधि अनुभवी, दक्ष, सक्षम प्राध्यापक र कर्मचारीलाई पाखा लगाएर नयाँलाई भित्र्याउने मनसायबाट अभिप्रेरित रहेको कतिपयको बुझाइ छ । यही कुरालाई बुझेका विद्यार्थी संगठनहरूले समेत क्याम्पस सञ्चालक समितिले ल्याएको कार्यविधिको विरोध गरेका छन् । प्राध्यापक र कर्मचारीसँग कुनै छलफल नगरिएकोले कार्यविधि बदनियतका साथ ल्याइएको हुने उनीहरूको आरोप छ ।
कार्यविधिअनुसार तीन प्राध्यापक र दुई कर्मचारीलाई हुलाकमार्फत घरमा अवकाश पत्र पठाइएबाट पनि सञ्चालक समितिको बदनियत स्पष्ट हुन्छ । क्याम्पसका सञ्चालक समितिका अध्यक्ष ध्रुवकुमार धितालले नियमावलीको नबुझेर विरोध भएको दाबी गरे ।
‘हामीले सुविधासहित बिदा गर्ने गरी २५ वर्षे सेवा अवधिको प्रावधान ल्याएका हौँ,’ अध्यक्ष धितालले भने, ‘धेरै प्राध्यापक र कर्मचारीले यसलाई स्वागत गर्नुभएको छ । केहीले नबुझेर विरोध गर्नुभएको हो । यसबाट कोही तर्सिनुपर्ने छैन । सबैलाई लागू भएको हो ।’
क्याम्पसका उपप्रध्यापक मुक्तिनाथ गैरेले सञ्चालक समितिले ल्याएको कार्यविधिले क्याम्पसमा कार्यरत प्राध्यापक र कर्मचारीको करियरमा ठेस पुर्याउने देखिएको बताए ।
राममणि २०४५ सालमा स्थापित सामुदायिक क्याम्पस हो । क्याम्पसमा कक्षा ११ देखि स्नातकोत्तर तहसम्म व्यवस्थापन, शिक्षा र मानविकी संकायको पढाइ हुन्छ ।
२०७५ मा विश्वविद्यालय अनुदान आयोगबाट क्यूएए प्राप्त गरेको छ । पब्लिक क्याम्पस प्राध्यापक संघका सभापति राजेन्द्र थापाले विज्ञप्ति जारी गर्दै आयातित शैलीमा एकाएक नियमावली ल्याएर अवकास दिने निर्णय गरिनु खेदजनक भएको बताएका छन् । दुई हजार ६०० विद्यार्थी अध्ययन गर्ने क्याम्पस जिल्लामा सम्भावना बोकेको क्याम्पसमा पर्छ ।
