यसरी विद्यालयको जग्गामा मनपरी गरेपछि अख्तियार दुरुपयोग अनुसन्धान आयोगको कार्यालय बुटवलमा उजुरीसमेत परेको छ ।

उक्त जग्गा डेढ बिगाह बढी छ । सो जग्गाको पछाडि विभिन्न किसानहरूसँग स्थानीय जग्गा व्यापारी सिद्ध अधिकारी लगायतका व्यक्तिले जग्गा खरिद गरी विद्यालयसंग सहकार्य नै नगरी मनपरी बाटो खोलेर प्लटिङ गरेपछि उक्त विषय अख्तियारमा पुगेको हो ।

उक्त विद्यालयको नाममा २०३६ सालदेखि ४ बिगाह जग्गा रहेको छ । सो जग्गा सुरुमा स्थानीयले जोतभोग गर्ने तथा विद्यालयलाई भाडाबापत केही रकम दिने गरेको विद्यालयको रेकर्डमा छ । पछिल्लो समय विद्यालयले जग्गाको प्रयोगमा ध्यान नदिंदा अहिले प्लटिङ गर्ने र किनबेचसमेत हुन स्थिति आएको हो ।

उक्त उजुरीमा सिद्ध अधिकारीले विद्यालयको जग्गा विष्णु गिरीको मिलेमतोमा दुरुपयोग गरेको आरोप लगाइएको छ । उता, आरोपित अधिकारीले आफूले दुई वर्ष अगाडि धर्मराज खनालसंग ११ कठ्ठा जग्गा खरिद गरी अहिले बाटो बनाउने काम गरेको बताए ।

उनले आफूले विद्यालयको जग्गा नमिची उनीहरूले बनाएको सडकसंग जोड्ने काम मात्र गरेको बताए । विद्यालयको जग्गामा खानेपानी टंकी पनि निर्माण हुंदैछ । यस्तै केही ठाउंमा सडक खोलिंदै छ । तर यसबाट विद्यालय परिवार बेखवर जस्तै रहेको छ ।

विद्यालयका प्रधानाध्यापक विष्णुप्रसाद ज्ञवालीले यस बारे केही थाहा नभएको बताए ।