गैरआवासीय नेपालीहरुको कम्पनी नेपोलियन टाइगर इन्भेष्टमेन्ट (एलएलसी) ले भैरहवाको पाँचतारे होटल टाइगर प्यालेस किनेको छ।

कम्पनीले पाँच अर्ब रुपैयाँमा यो होटेल किनेको हो। एलएलसी कम्पनीको अध्यक्षमा बुद्धिसागर सुवेदी छन्। उनी गैरआवासीय नेपाली संघ अमेरिकाका निवर्तमान अध्यक्ष हुन्। सुवेदीले होटल किनेको पुष्टि गर्दै दुई साता अघिदेखि व्यवस्थापन सम्हालेको जानकारी दिए।

‘झण्डै ६ महिनादेखि हामी होटल किन्ने छलफलमा थियौं। केही पहिला मात्रै डिल सम्भव भएको हो,’ उनले भने, ‘हामीले व्यवस्थापन लिएर होटल चलाउन सुरु गरिसकेका छौं।’ खरिद गरेको रकम भने उनले प्रष्ट खुलाएनन्।

‘हामीले ऋण सकार्नेदेखि बक्यौता लगायत गर्दा ५ देखि ६ अर्बको हाराहारीमा हुनसक्छ,’ सुवेदीले भने।

नेपालमा मुद्दा भएकोले होटल किनबेच भने देशबाहिर (अफसोर कारोबार) भएको हो। होटलमा प्राइम कमर्सियल बैंकको नेतृत्वमा तीन वटा बैंकले लगानी गरेका छन्। बैंक स्रोतका अनुसार सिल्भर हेरिटेजले गैरआवासीय नेपाली अमेरिकाको कम्पनीले होटल खरिद गरेको जानकारी गराइसकेको छ।

बहुराष्ट्रिय कम्पनी सिल्भर हेरिटेज इन्भेस्टमेन्ट प्रालिको आफ्नो स्वामित्वको होटल एलएलसीले किनेको हो। यो कम्पनीमा एनआरएनहरुको स्वामित्व छ। कम्पनीमा क्यानडा, अमेरिका र युरोपियन देशहरुमा सक्रिय एनआरएनहरुको लगानी छ।

अध्यक्ष सुवेदीका अनुसार होटलको सबै दायित्व बेहोर्ने गरी होटल किनेको जानकारी दिए। सहमति अनुसार क्यासिनोको रोयल्टी क्रेता कम्पनीले नै तिर्नेछ। क्यासिनोको रोयल्टी झण्डै १४ करोड रुपैयाँ छ।

सिल्भर हेरिटेजको कम्बोडिया, अष्ट्रेलिया र हङकङमा पनि लगानी छ। होटल खरिदपछि कुनै विवाद नआओस् भनेर कम्पनीले कम्बोडिया, अष्ट्रेलिया र हङकङमा वकिल राखेर राय लिएको थियो। सुवेदीले होटल खरिदमा कुनै पनि कानुनी उल्झन नआओस् भनेर सबै उपाय अवलम्बन गरिएको दाबी गरे।

यो होटल किन्न देशभित्रकै व्यापारिक घराना र विदेशमा रहेका नेपाली दौडमा थिए। तर कानुनी उल्झन र केही समूहको होटल सस्तो मूल्य बनाएर हत्याउने योजनाले खरिद प्रक्रिया जटिल बनेको थियो।

स्रोतका अनुसार एलएलसीले होटल खरिद गर्न नदिने समूहलाई नै साथ लिएको छ। ‘उहाँहरुको साथविना यो डिल सम्भव छैन,’ एक लगानीकर्ताले भने, ‘यो डिल भत्किंदैन। मुद्दा मामिला सकेर होटल पनि स्मुथ्ली अगाडि बढ्छ।’