बुटवल । लुम्बिनी प्रदेशमा हाल सम्म ६८ प्रतिशत मात्रै धान रोपाइं सकिएको छ ।
कृषि विकास निर्देशनालयका सूचना अधिकारी एवं कृषि अर्थ विज्ञ डिल्लीराज पौडेलले लुम्बिनी प्रदेशमा ६८ दशमलव ३ प्रतिशत मात्रै रोपाइं सकिएको जानकारी दिए ।
समयमै पानी नपरेपछि प्रदेशका अधिकांश भूभागका किसानले ढिलोगरी रोपाइं शुरु गरेको उनको भनाई छ ।
नवलपरासी पश्चिममो १४ हजार ३५० हेक्टरमा रोपाइं भएको छ । रुपन्देहीमो ४७ हजार ६२३ हेक्टर, कपिलवस्तुमा, ४५ हजार ५४६ हेक्टर, पाल्पामो ६ हजार ५६८ हेक्टर, गुल्मीमा ५ हजार २०९ हेक्टर धान रोपाई भएको छ ।
यसैगरी अर्घाखांचीमो ५ हजार ६३५ हेक्टर, दाङमा ११ हजार २२९ हेक्टर, प्यूठानमा ६ हजार ३२९ हेक्टर, रोल्पामा धान रोपाइं हुने ४ हजार ६३८ हेक्टर क्षेत्रफलमध्ये ४ हजार ४५२ हेक्टर अर्थात ९६ प्रतिशत रोपाइं सकिएको छ ।
बांकेमा धान उत्पादन हुने ३३ हजार हेक्टर क्षेत्रफलमध्ये १४ हजार ८५० हेक्टर अर्थात ४५ प्रतिशत रोपाइं सकिएको छ । बर्दियामा ४९ हजार ३३ हेक्टर क्षेत्रफलमध्ये ३६ हजार २८४ हेक्टर अर्थात ७४ प्रतिशत रोपाइं सकिएको निर्देशनालयका सूचना अधिकारी पौडेलले बताए ।
सबैभन्दा कम धानखेती हुने रुकुम पूर्वमा ९० प्रतिशत रोपाइं सकिएको छ । धान रोपाइं हुने एक हजार ४ सय १९ हेक्टरमध्ये एक हजार २७७ हेक्टर क्षेत्रफलमा रोपाइं सकिएको छ ।
