नेकपा एमालेले रूपन्देहीका ५ वटै क्षेत्रमा उम्मेदवार टुंगो लगाएको छ ।
रूपन्देही क्षेत्र नम्बर १ मा केन्द्रीय सदस्य तथा पूर्वप्रदेशसभा सदस्य दधीराम न्यौपाने, रूपन्देही २ बाट एमाले उपाध्यक्ष तथा पूर्वअर्थमन्त्री विष्णु पौडेल र क्षेत्र नम्बर ३ मा वासुदेव घिमिरे उम्मेदवार बन्ने टुंगो लागेको हो ।
यस्तै क्षेत्र नम्बर ४ मा महिला नेतृ सुनीत ठठेर र क्षेत्र नम्बर ५ मा खिमलाल भट्टराई उम्मेदवार बन्ने भएका छन् ।
एमाले सचिव छविलाल विश्वकर्मा उम्मेदवार नबन्ने घोषणा गरेसँगै न्यौपानेलाई पार्टीले अघि सारेको हो ।
यस्तै क्षेत्र नम्बर ३ उम्मेदवार घिमिरे यसअघि क्षेत्र नम्बर ५ बाट उम्मेदवार बनेका थिए । उनी तिलोत्तमा नगरपालिकाका पूर्वमेयर तथा युवा नेता हुन् ।
क्षेत्र नम्बर ४ की उम्मेदवार ठठेर पूर्वप्रदेशसभा सदस्य हुन् ।
यस्तै क्षेत्र नम्बर ५ मा भट्टराई पूर्व राष्ट्रियसभा सदस्य हुन् ।
शनिबार बसेको एमाले सचिवालय बैठकले एमाले उपाध्यक्ष तथा पूर्वअर्थमन्त्री पौडेललाई पाल्पा २ बाट उम्मेदवार बनाउने निर्णय गरेको थियो ।
अन्ततः उनले रूपन्देही २ बाटै प्रतिस्पर्धा गर्ने भएका छन् ।
योसँगै ५ वटै क्षेत्रमा उम्मेदवारको टुंगो लागेको हो ।
