पाल्पा र रुपन्देहीमा प्रभावशाली नेताहरू
एमालेका उपाध्यक्ष एवं पूर्व अर्थमन्त्री विष्णु प्रसाद पौडेल पाल्पा क्षेत्र नं. २ बाट उम्मेदवार बन्ने भएका छन्। पाल्पाकै क्षेत्र नं. १ मा नारायण आचार्यले टिकट पाएका छन्। रुपन्देहीमा चर्चाको केन्द्रमा रहेको क्षेत्र नं. ३ मा वासुदेव घिमिरेलाई उम्मेदवार बनाइएको छ भने क्षेत्र नं. ५ मा खिमलाल भट्टराईले टिकट पाएका छन्। रुपन्देहीका क्षेत्र नं. १ र २ मा भने अहिले नाम सार्वजनिक गरिएको छैन, जहाँ थप परामर्श आवश्यक रहेको बताइएको छ।

गुल्मी र अर्घाखाँचीमा स्थापित अनुहार
एमालेका प्रभावशाली नेताहरू प्रदीपकुमार ज्ञवाली र गोकर्ण विष्ट पुनः गुल्मीबाटै चुनावी मैदानमा उत्रिने भएका छन्। ज्ञवाली क्षेत्र नं. १ र विष्ट क्षेत्र नं. २ बाट उम्मेदवार बन्ने निश्चित भएको हो। अर्घाखाँचीमा पिताम्बर भुसालले टिकट पाएका छन् भने प्युठानमा युवा नेता सूर्यबहादुर थापा क्षेत्री उम्मेदवार हुनेछन्।

दाङ जिल्लाको क्षेत्र नं. ३ मा घनश्याम पाण्डेलाई उम्मेदवार बनाइएको छ। दाङका क्षेत्र नं. १ र २ मा भने निर्णय हुन बाँकी छ। बाँकेमा क्षेत्र नं. १ बाट सूर्य ढकाल र ३ बाट दल बहादुर सुनारले टिकट पाएका छन् भने क्षेत्र नं. २ मा उम्मेदवार तय हुन बाँकी छ। बर्दियामा क्षेत्र नं. १ बाट शालिकराम अधिकारी र २ बाट विमला बिकलाई मैदानमा उतारिएको छ।

कपिलवस्तुमा क्षेत्र नं. १ मा विश्राम चौधरी र ३ मा वीरेन्द्र प्रसाद कनौडिया उम्मेदवार बन्ने भएका छन्। कपिलवस्तु-२ मा भने अझै अन्योल कायम छ। नवलपरासी पश्चिमको क्षेत्र नं. १ मा रामप्रसाद पाण्डे र २ मा भगवती प्रसाद यादवले टिकट पाएका छन्। पहाडी जिल्ला रोल्पामा गोकुल घर्ती उम्मेदवार बन्ने तय भएको छ।
अझै कहाँ-कहाँ टुंगिन बाँकी छ ?
लुम्बिनी प्रदेशका केही महत्वपूर्ण क्षेत्रहरूमा भने एमालेले अझै उम्मेदवार घोषणा गरेको छैन। उपमहासचिव भट्टका अनुसार रुपन्देहीका क्षेत्र नं. १ र २, कपिलवस्तुको क्षेत्र नं. २, दाङका क्षेत्र नं. १ र २ तथा बाँकेको क्षेत्र नं. २ मा उम्मेदवारको नाम अझै टुंगिन बाँकी छ। यी क्षेत्रहरूको अन्तिम निर्णय गर्ने जिम्मा सचिवालयले पार्टी अध्यक्ष केपी शर्मा ओलीलाई दिएको छ।