रात्रीकालिन पर्यटकलाई लक्षित गर्दै तिलोत्तमा नगरपालिकाले यो आयोजना सुरु गर्न लागेको हो ।

कुञ्जपार्क व्यवस्थापन समितिका अध्यक्ष लोक पुनले ‘म्युजिकल वाटर फाउण्टेन’ नेपालमै नयाँ प्रविधिको बन्न लागेको बताए । तिलोत्तमा नगरपालिकाले चालु आर्थिक बर्षका लागि १ करोड १ लाख बजेट विनियोजन गरेर ‘म्युजिकल वाटर फाउण्टेन’ बनाउने तयारी गरेको छ । अपुग रकम आगामी आर्थिक बर्षको बजेट बाट व्यवस्थापन गरिनेछ ।
कुञ्जपार्कलाई रात्रिकालिन पार्कको रुपमा विकास गरिदै आएको र थप पार्कलाई आर्कषित बनाउन ‘म्युजिकल वाटर फाउण्टेन’ले ठुलो भूमिका निर्वाह गर्ने उनले बताए ।

पार्क भित्र रहेको पोखरीको बीचमा ‘म्युजिकल वाटर फाउण्टेन’ बनाउन लागिएको हो । ‘यो नौलो हुनेछ । हामी अत्याधिक गर्मी हुने ठाउँमा छौ । रात्रिकालिन पार्क समेत यो भएकाले ‘म्युजिकल वाटर फाउण्टेन’ नेपालमै पहिलो हुनेछ’ अध्यक्ष पुनले भने । ‘म्युजिकल वाटर फाउण्टेन’ तयार भएपछि पार्कलाई राती ११ बजे सम्म सञ्चालन गरिनेछ । जसका कारण आन्तरिक पर्यटन, बाह्य पर्यटनको आर्कषण केन्द्र पार्क बन्ने विश्वास समितिले लिएको छ ।

परापूर्वक कालको पोखरीलाई स्तरउन्नती गरिएकाले ‘म्युजिकल वाटर फाउण्टेन’ राख्दा निश्चित क्षेत्रभित्र पाईपहरु विच्छाईनेछ । बोटहरु सञ्चालनमा समेत सहज हुनेगरी पाईप, पम्पहरु जडान गरेर ‘म्युजिकल वाटर फाउण्टेन’ तयार गरिने अध्यक्ष पुनले जानाकारी दिए ।

तिलोत्तमा–६ का वडा अध्यक्ष गणेश पाठकले कुञ्ज पार्कलाई रात्रिकालिन पर्यटनको हव बनाउने गरी काम भइरहेको बताए । ‘म्युजिकल लाईट सहितको वाटर फाउण्टेन भएकाले रातीमा पर्यटकलाई पार्कमा ल्याईनेछ । त्यो हेर्नका लागि पनि पर्यटक एक दिन भएपनि बस्नुपर्नेछ । यसले पर्यटकको बसाई लम्बिने छ’ उनले भने ।

तिलोत्तमा नगरपालिकाले नगरको गौरवको आयोजनाको रुपमा ‘म्युजिकल वाटर फाउण्टेन’ निर्माण गर्न लागेको भन्दै उनले फाउण्टेन यस क्षेत्रकै नमुना हुने बताए ।

अक्षयधाममा रेजर र थ्री डी रहेपनि पार्कमा निर्माण गरिने ‘म्युजिकल वाटर फाउण्टेन’मा रेजर लाईट र थ्री डी नहुने बताए । ‘हाम्रो नर्मल फाउण्टेन हो । तर त्यसलाई पम्पको माध्यमबाट म्युजिक अनुसार पानी र लाईट मिश्रित फोहोरा देखाउने छौ’ उनले भने ।

उनले लुम्बिनीमा आउने पर्यटकलाई ‘म्युजिकल वाटर फाउण्टेन’ देखाउनकै लागि कुञ्जपार्क सम्म ल्याउन सकेमा पनि सिंगो नगरपालिकाले पर्यटकबाट लाभ लिन सक्ने बताए ।

‘कुञ्जपार्कलाई रात्रिकालिन पार्क बनाउने गरी अहिले काम भइरहेको छ । रातीमा के देखाउने पर्यटकलाई ? त्यसैलाई मध्यनजर गरेरै हामीले अरु पुर्वधार पनि थप गर्ने योजनामा छौ’ उनले भने ।

तिलोत्तमा नगरपालिका बरिष्ठ ईन्जिनियर प्रदीप वनले म्युजिक संगै रंग परिर्वतन हुने नयाँ फाउण्टेन निर्माण गर्न लागिएको बताए । ‘पोखरीको उत्तरपट्टीको भागमा माउण्टेन बनाईनेछ । त्यसलाई सफा पानी आवश्यक पर्ने भएकाले फाउण्टेन जडान स्थानको तल ढलान गरिनेछ । यसो हुँदा पानी फोहोर हुन पाउँदैन’ उनले भने ।

उनले रंग र पानी म्युजिकको तालमा चल्ने भएकाले पर्यटकको आर्कषण बढ्ने बताए । नगरपालिकाले १ करोड १ लाख बजेट छुटाएपनि लागत अनुमान १ लाख ६७ भएकाले बहुबर्से योजनामा राखेर काम हुने उनको भनाई छ ।

तिलोत्तमा नगरपालिकाका नगरप्रमुख रामकृष्ण खांणले फाउण्टेन तयार भए पश्चात तिलोत्तमा नगरभित्र पर्यटकिय गन्तव्यको नयाँ उचाई थपिने बताए । ‘हामीले प्राकृतिक सुन्दरतालाई खलल नपुराउने गरी काम गरिरहेका छौ । यसले पर्यटन प्रबद्र्धन मात्र हुँदैन । नगरपालिकाले यसबाट आम्दानी समेत गर्नेछ’ उनले भने ।

खेलको क्षेत्रमा उल्लेख्य प्रगति गरेको झरना स्पोर्टस क्लव र त्यस क्षेत्रका स्थानियहरुले यो पार्कको ब्यवस्थापन र संरक्षणमा लागेको छन । ‘स्थानीय स्तरमा खेलकूदसँगै रमणीय र पर्यटकीय स्थलको स्थापना गरी पर्यटनमा टेवा पुुर्याउन क्लबले पहल गरेको हो।’ क्लबका अध्यक्ष लोक पुनले भने ।

पर्यटकको आर्कषणको केन्द्र बन्दै पार्क
अहिले पनि कुञ्जपार्कमा आन्तरिक एवं बाह्य पर्यटकहरु दैनिक ३ सय बढि पुग्ने गरेका छन् । यो
पार्कमा घुम्न र यहाँको शान्त मनोरम वातावरणमा अनन्द लिन पर्यटकको घुईचो नै लाग्ने गरेको छ ।

विसं २०६६ मा स्थापना भएको पार्कको मुख्य विशेषता त्यहाँ रहेको तलाउ हो । करिब एक बिघा क्षेत्रफलमा फैलिएको सो पोखरीमा सयरका लागि पाँच वटा डुङ्गा सञ्चालनमा छन । पार्कभित्र ६ वटा पिकनिक सेडहरु निर्माण गरिएका छन ।
पार्कमा रहेका पानीका फोहरा, कुञ्ज क्याफे, मनमोहक बगैँचा, पुरानो समइमाई मन्दिर, बाल उद्यान, हरियाली र शान्त वातावरणको कारण त्यहाँ पुग्नेहरुको भीड हुने गर्दछ ।

पार्क करिब तीन बिघा क्षेत्रफलमा फैलिएको छ ।

चाइनिज गुलाफ, पिटोनिया, डालिया, पाउलानिया, गुल्मोहर, चेरी, क्रिसमस ट्रि, ब्याम्बो आदि प्रजातिका बिरुवाले पार्क हरियाली र हराभरा बनेको छ । पोखरीको चारैतिर राखिएका विद्युतीय बल्बको कलर लाइटिङले सांझपख पार्कको सुन्दरतालाई झनै बढाएको छ । आँप, लिची, कटहर र रक्तचन्दनका रुख पनि पार्कभित्र छन ।

शताब्दी अगाडि तराईवासीहरुको बासस्थान रहेको सो ठाउँमा थारु समुदायकी महिला कुञ्जलीले तलाउ खनेको कथन छ । पहिले झाडी भएको ठाउँलाई विस्तारै सफा गर्दै ६ वर्षदेखि कुञ्जपार्कका रुपमा व्यवस्थापन हुँदै आएको छ ।

पार्कसँगै जोडिएको उमा आधारभूत विद्यालयको चार बिघा जग्गा ३० वर्षका लागि भाडामा लिएर यसको विस्तार गर्ने योजना रहेको समितिको छ । ‘रमाईलो उद्यान, हिड्ने ट्रायाक, ग्रिनेरी सहितका संरचना त्यहाँ बन्नेछन्’ अध्यक्ष पुनले भने । उनले पार्कमा व्यवस्थापनमा कंत्रिट संरचनालाई प्राथमिकतामा नराखेको समेत बताए ।

पार्कमा अवलोकनका लागि अहिले प्रतिव्यक्ति ३० रुपैयाँ लाग्छ । पार्कबाट बार्षिक ४० लाख बढि आम्दानी हुने गरेको छ । तराई क्षेत्रको लोपोन्मुख काठको लडिया पनि पार्कमा राखिएको छ । पार्कभित्रै चारसय वर्ष पुरानो दावी गरिएको कर्माको रुख, थारु समुदायले देवताका रुपमा मान्ने सोमै माई थान (मन्दिर) र हिन्दु धर्मावलम्वीको दुर्गा मन्दिर पनि छ ।