लुम्बिनी प्रदेश सरकारको बेरुजु रकम साढे चार अर्बभन्दा माथि देखिएको छ । महालेखा परीक्षकको ६२ औँ प्रतिवेदन अनुसार प्रदेश सरकारको बेरुजु रकम बढेको बढ्यै छ । प्रतिवेदनमा उल्लेख भएअनुसार प्रदेशेको बेरुजु रकम ४ अर्ब ५७ करोड ५१ लाख ३७ हजार छ । यो बेरुजु रकम आर्थिक वर्ष २०८०–०८१ को हो ।
महालेखाले बुधबार मात्रै राष्ट्रपति समक्ष प्रतिवेदन बुझाएको थियो । उक्त प्रतिवेदनमा प्रदेशहरुको बेरुजु रकम उल्लेख छ । महालेखाको प्रतिवेदनमा उल्लेख भएअनुसार लुम्बिनी सरकारको बेरुजु रकमको दर पतिशतका आधारमा गत वर्षभन्दा केही घटेको देखिएको छ । तर रकम भने बढेको महालेखाले जनाएको छ ।
प्रतिवेदन अनुसार प्रदेश सरकारको बेरुजु रकम अभिल्लो आर्थिक वर्ष भन्दा ६५ करोड ८२ लाख १६ हजार रुपैयाँले बढेको छ । आर्थिक वर्ष २०७९–०८० मा बेरुजु रकम ३ अर्ब ९१ करोड ६९ लाख २१ हजार थियो ।
प्रतिशतको आधारमा भने लुम्बिनी प्रदेशको बेरुजु दर घटेको देखिन्छ । आर्थिक वर्ष २०८०–८१ मा बेरुजु दर १.१३ प्रतिशत छ । यसअघिको प्रतिवेदनमा यो दर १.६० प्रतिशत थियो । बेरुजु देखिनु भनेको सरकारले अपारदर्शी रुपमा खर्च गरेको भन्ने बुझिन्छ ।
