बुटवल । बुटवलको चौराहादेखि चिडिया खोलासम्मको सडक ०७३ मा ठेक्का सम्झौता भए पनि अझैसम्म निर्माण सम्पन्न भएको छैन । तीन किलोमिटर सडक खण्ड ठेकेदारले आठ वर्षदेखि अलपत्र पारेपछि नयाँ ठेक्का लगाइएको छ ।
पुरानो ठेकेदार कञ्चनजंघा बिरुवा जेभी काठमाडौँसँग सम्झौता तोडेर सडक विभागले नयाँ ठेकेदारलाई जिम्मेवारी दिएको हो । डिभिजन सडक कार्यालय बुटवलका अनुसार बावुल दर्शन मालिका जेभीले निर्माणको जिम्मेवारी पाइसकेको छ ।
सडक कार्यालय बुटवलका प्रमुख जिवेन्द्र मिश्राका अनुसार बुटवलको चौराहादेखि गोलपार्कसम्मको ३।२५ किलोमिटर सडक ६ लेनमा विस्तार गर्न लागि भ्याटसहित ३३ करोडमा ठेक्का लागेको हो ।
यसअघिको कम्पनीसँग २०७६ सम्ममा सडक विस्तार सक्ने गरी ०७३ चैत १७ मा ठेक्का सम्झौता भएको थियो । तर, सात वर्षसम्म पटक–पटक म्याद थप्दासमेत सडक विस्तार सम्पन्न नभएपछि गत वैशाखमा डिभिजन सडक कार्यालय बुटवलले उक्त ठेक्का रद्द गरेको थियो । अहिले एक वर्षमा काम सक्ने गरी ठेक्का लगाएको डिभिजन सडक कार्यालय बुटवलका सूचना अधिकारी इन्जिनियर महेश्वर लम्सालले बताए ।
उनले भने, बुटवलको सडक हामीले ठेक्का तोडेपछि नयाँ ठेकेदारले पनि उस्तै ढिलाइ गरे भने त्यसको कुनै अर्थ रहन्न । त्यस कारणले समयमा सक्ने गरी सम्झौता गर्ने हो ।’
