बाढी, पहिरोबाट प्रभावितहरुलाई सुरक्षित स्थानमा सारिएको र पुर्नस्थापनाको काम अघि बढेको आन्तरिक मामिला तथा कानुन मन्त्रालयका सूचना अधिकारी गंगाधर पाण्डेले जानकारी दिए । उनका अनुसार बाढी र पहिरोको उच्च जोखिममा रहेका स्थानीयहरुलाई सार्वजनिक भवन, छिमेकी तथा आफन्तको घरमा बसेका छन् ।

नवलपरासी वर्दघाट-२ बासखोलामा ९ जनाको घर बाढीका कारण डुबानमा परेर क्षती भएको छ । स्थानीय कोशबहादुर आले, हरीबहादुर राई, कादर दर्लामी, तोमन सिंह दर्लामी, तिलकुमारी बाह्रघरे, बमबहादुर बाह्रघरे, तिलकबहादुर रुचालको घर तथा गोठमा क्षती पुगेको छ । सुस्ता गाउँपालिका-५ बड्काटोलमा बाढी पसेको छ ।

नारायणी नदीको पानीको वहाव बढ्दा बाँध समेत फुटेर पानी बस्तीमा छिरेको थियो । स्थानीय प्रहरी र समुदायका नागरिकहरुलाई सार्वजनिक भवनमा सारिएको छ । पाल्पा रैनादेवी छहरा-१ का ज्ञानबहादुर कुमालका १२ जनाको परिवारलाई छिमेकीको घरमा सारिएको छ । बगनासकाली-६ निवासी देवनारायण बस्यालको घर पूर्णरुपमा बस्न नमिल्ने भएपछी दुई जना सदस्यलाई सुरक्षित स्थानमा सारिएको छ । तानसेन-५ कैलाशनगर सुकुम्वासी टोलमा पहिरो झर्दा ९ वटा घर जोखिममा परेपछी सुरक्षित स्थानमा सारिएको छ ।

रम्भा-३ ज्ञानिसरा चिर्तौरको घर जोखिममा परेपछी ७ जना परिवारका सदस्यलाई छिमेकीको घरमा सारिएको, निस्दि–५ निवासी नरबहादुर खरुको घर जोखिममा परेपछी तीन जना सदस्यलाई सुरक्षित स्थानमा सारिएको, रैनादेवि छहरा-१ मनिकला कुमाल, ओमप्रकाश कुमाल, रीता कुमाल, सिमा कुमाल, मालती नेपालीको घर जोखिममा परेपछी ११ जना सदस्यहरुलाई आफन्तको घरमा सारिएको छ । माथागढी-७ निवासी लोकमायाँ चुहानको घर जमिन भासिदा जोखिममा परेपछी ७ जना सदस्य पुरानो घरमा बसेको, सोही ठाउँ निवासी हिराबहादुर ढेंगाको घर पनि बस्न नमिल्ने भएपछी ४ जना सदस्य पुरानो गोठमा बसेको जनाइएको छ । रैनादेवी छहरा-१ निवासी कमला गरम्जाको घर पहिरोले पुरिएपछी तीन जना सदस्यलाई आफन्तको घरमा सारिएको छ ।

रीब्दीकोट-४ निवासी मिनप्रसादको घर अगाडी पहिरो खस्दा जोखिम बढेपछी चार जना सदस्यलाई सुरक्षित स्थानमा सारिएको हो । पाल्पा तिनाउँ-१ निवास निरज सास्कोटीको घर पहिरोले पुरिएपछी चार जनालाई सुरक्षित स्थानमा सारिएको छ ।

गुल्मी छत्रकोट-५ निवासी कृष्ण विकको घरमा क्षती पुगेपछी तीन जनालाई सुरक्षित स्थानमा सारिएको छ । रोल्पा त्रिवेणी-६ धरमखोला निवासी केशरबहादुर वलीको बाख्रा गोठ भत्किएको छ । यस्तै माडी गाउँपालिका-४ बुढागाउँ निवासी गनबहादुर घर्तीको कुखुरा फारममा क्षती पुगेको छ ।

कोटिहवामा रहेको लक्ष्मी स्टिल ईण्डस्ट्रिजमा कराडौंको क्षति

३ दिनदेखिको लगातार वर्षाले रुपन्देही तिलोत्तमा नगरपालिका वडा नं.१७, कोटिहवामा रहेको लक्ष्मी स्टिल ईण्डस्ट्रिजमा वर्षाले ठूलो क्षति पुगेको छ । उद्योगभित्र ३ फुटसम्म पानी पसेर ताल बनेको छ । बाथरुम सेट, बेल्चा, हेल्मेटका पी फर्म लगायत उत्पादन गर्ने उद्योगका ३ दर्जनभन्दा बढी मेशिनहरू डुबानमा परेका आवास ग्रुपका प्रबन्ध निर्देशक महेश थैवले बताए ।

आवास ग्रुपको सो क्षेत्रमा ९ वटा उद्योगहरु छन् । त्यसमध्येको लक्ष्मी स्टिलमा वर्षाले क्षति पुगेको थैबले बताए । उनका अनुसार पानीमा डुबेका मेशिनहरु चल्ने अवस्थामा नरहेको हुँदा विशेषज्ञबाट जाच गराएर मर्मत गर्नुपर्ने भएको छ । वर्षाको पानी उद्योग र कार्यालयहरूमा भरिएकोले पानी मोटर प्रयोग गरी पानी फाल्ने प्रयास भइरहेको छ । अहिले उद्योगको उत्पादन प्रक्रिया, ढुवानी र कामदारहरूको आवागमनमा बन्द रहेको संचालक थैवले बताए ।

यसबाट उद्योगलाई करोडौंको आर्थिक नोक्सान भएको पनि उनले जनाए ।