भैरहवामा नियमित उडान गर्न जजिरा एयरलगायतका वायुसेवा कम्पनीले पनि इन्धनमा छुट माग गर्दै आएको छ । मन्त्रालयकी सहसचिव ईन्दु घिमिरेले विदेशी एयरलाइन्सले भैरहवामा उडान गर्न विभिन्न छुट माग गरेको यसमा प्रधानमन्त्रीले सहुलियतका प्याकेज ल्याउन निर्देशन दिएको बताईन ।

विमानस्थल सञ्चालनसंग जोडिने निकायलाई छुट तथा सेवा विस्तार गर्न पत्र काटेको उनको भनाई छ । भैरहवा विमानस्थल सञ्चालनमा आएको केही समय जजिरा एयरवेजले नियमित उडान गरे पनि यात्रु काठमाडौं आउने बाध्यताले नियमित गर्न सकेन ।

उड्ययन मन्त्रालयले उद्योग, वाणिज्य तथा आपूर्ति मन्त्रालयलाई हवाइ इन्धनमा छुटको लागि पत्र काटेको छ । मन्त्रालयले आयल निगमलाई पत्र काटेर बोर्डबाट भैरहवा विमानस्थलको हवाइ इन्धनमा छुट दिन सक्नेछ ।

वैदेशिक रोजगारीमा जानेका लागि पछिल्लो समय श्रम स्वीकृति अनलाइनबाट हुने भए पनि मेडिकलको लागि काठमाडौं आउनुपर्ने बाध्यता छ । श्रम तथा रोजगार मन्त्रालयलाई श्रम स्वीकृति र बायोमेट्रिकमा सहजीकरण गर्न आग्रह गरिएको छ ।

श्रम मन्त्रालयले नै मेनपावर कम्पनीको शाखा खोल्न सहजीकरण गर्नुपर्ने उड्ययन मन्त्रालयको भनाइ छ । भैरहवामा विमानस्थल भए पनि भिसा लगाउन काठमाडौं नै आउनुपर्ने बाध्यता छ ।

परराष्ट्र मन्त्रालयलाई काठमाडौंमा रहेका भिसा सेन्टरलाई भैरहवामा खोल्ने व्यवस्थाको लागि कूटनीतिक पहल गरिदिन पर्यटन मन्त्रालयले आग्रह गरेको छ ।

मन्त्रालय अन्तर्गतकै नागरिक उड्ययन प्राधिकरणलाई ग्राउन्ड ह्यान्डलिङ शुल्क, सेवाशुल्कमा निश्चित अवधिको लागि छुट दिने प्रस्ताव ल्याउन निर्देशन दिएको छ ।