लुम्बिनी प्रदेशका मुख्यमन्त्री डिल्लीबहादुर चौधरीले आज प्रदेश सभाबाट विश्वासको मत लिने भएका छन् । दिउँसो ४ बजे बस्ने प्रदेश सभा बैठकमा उनले विश्वासको मत लिने तयारी गरेका हुन् ।
केन्द्रमा नयाँ गठबन्धन बनेसँगै मुख्यमन्त्री चौधरीले नेकपा (माओवादी केन्द्र)का मन्त्रीलाई बर्खास्त गरेका थिए । त्यसपछि माओवादीले सरकारलाई दिएको समर्थन फिर्ता लिएको थियो । सरकारमा सहभागी दलले समर्थन फिर्ता लिएपछि ३० दिनभित्र विश्वासको मत लिनुपर्ने संवैधानिक व्यवस्था छ ।
तर, उनले विश्वासको मतअघि नै राजीनामा दिने सम्भावना पनि छ । विश्वासको मत लिने कि राजीनामा दिने भन्नेमा उनी दोधारमै रहेको कांग्रेसकै नेताहरू बताउँछन् ।
नेपाली कांग्रेस लुम्बिनी प्रदेशसभाका प्रमुख सचेतक जन्मजय तिमिल्सेनाले दिउँसो १ बजे बस्ने पार्टी संसदीय दलको बैठकले विश्वासको मत लिने कि पहिले नै राजीनामा दिने भन्ने टुंगो लाग्ने बताए । ‘विश्वासको मत पाउने अवस्था देखियो भने मत लिनुहुन्छ । त्यो अवस्था रहेन भने पहिले नै राजीनामा दिने भन्ने टुंगो बैठकले लगाउँला,’ तिमिल्सेनाले भने ।
८७ सदस्यीय प्रदेशसभामा बहुमतका लागि ४४ सांसदको समर्थन आवश्यक पर्छ । लुम्बिनीमा १० राजनीतिक दलको प्रतिनिधित्व छ । लुम्बिनीमा एमालेका २९, कांग्रेसका २७, माओवादीका (सभामुखसहित) ११, राष्ट्रिय प्रजातन्त्र पार्टी (राप्रपा) र नागरिक उन्मुक्ति पार्टीका ४/४, जनता समाजवादी पार्टी (जसपा), जनमत पार्टी र लोकतान्त्रिक समाजवादी पार्टी (लोसपा)का ३–३, राष्ट्रिय जनमोर्चा र एकीकृत समाजवादी र स्वतन्त्रका १/१ जना सांसद छन् । राप्रपाका एकजना सांसद भ्रष्टाचारको अभियोगमा निलम्बनमा परेका छन् ।
यता माओवादी र नेकपा (एमाले)सहित दलहरूले केन्द्रीय समीकरणअनुसार माओवादीको नेतृत्वमा सरकार गठन गर्ने तयारी गरेका छन् । नयाँ समीकरणअनुसार लुम्बिनीको नेतृत्व माओवादीले गर्ने केन्द्रमा सहमति भएको छ ।
चौधरी गएको वैशाखमा मुख्यमन्त्री बनेका थिए । त्यसअघि एमालेका लिला गिरी मुख्यमन्त्री थिए । एक वर्षमै अब अर्को सरकार बनाउने तयारी छ ।
