होराइजन गौतम बुद्ध मा.वि तिलोत्तमामा खेल सप्ताहको अन्तिम दिन आज खाना महोत्सव पुरस्कार वितरण तथा रक्तदान कार्यक्रम सम्पन्न भएको छ ।
तिलोत्तमा नगरपालिका वडा नं. १ का वडा अध्यक्ष फर्सुराम गिरीको प्रमुख आतिथ्यतामा सम्पन्न भएको कार्यक्रममा न्यु होराइजन कलेज व्यवस्थापन समितिका अध्यक्ष निर्मल प्रसाद लाकौल, प्राचार्य गोपालप्रसाद आचार्य, सहायक क्याम्पस प्रमुख इन्द्र प्रसाद भुसाल, उपप्राचार्य ज्ञानेश्वर ज्ञवाली, विज्ञान संकाय प्रमुख प्रदीप अर्याल, प्राध्यापक डा.नारायण प्रसाद पन्थ, रुद्र भुसाल, विभिन्न विषयका विभागीय प्रमुख, शिक्षक तथा कर्मचारीहरु लगायतको आतिथ्यता रहेको थियो ।
यसैबीच दोस्रो त्रैमासिक परीक्षाको परीक्षाफलमा हरेक सेक्सनबाट प्रथम, द्वितीय एवम् तृतीय र सर्वोत्कृष्ट हुने विद्यार्थीहरू तथा अभिभावकलाई नगद तथा पुरस्कारबाट सम्मान गरिएको छ । राष्ट्रपति रनिङ्शिल्ड प्रतियोगिता २०८० मा उत्कृष्ट खेल प्रदर्शन गर्ने १८ जना विद्यार्थीहरूलाई समेत मेडल, नगद तथा प्रमाणपत्रद्वारा सम्मान गरिएको थियो भने विद्यालय बाहिर भएका विभिन्न अतिरिक्त क्रियाकलापमा विद्यालयको प्रतिनिधित्व गर्दै सहभागी भई उत्कृष्ट हुने विद्यार्थी, एमवीवीएस इन्जिनियरिङ् लगायत विभिन्न विधामा पूर्णछात्रवृत्तिमा नाम निकाल्न सफल विद्यार्थीहरूलाई समेत सम्मान गरिएको छ ।
कार्यक्रममा विद्यार्थीहरूले विभिन्न नृत्यहरू प्रस्तुत गरेका थिए । कार्यक्रममा बोल्दै प्रमुख अतिथि फर्सूराम गिरीले होराइजन मा.वि. देशकै उत्कृष्ट विद्यालय भएकोमा धन्यवाद दिंदै अतिरिक्त क्रियाकलापबाट विद्यार्थीहरूमा सिर्जनशीलता बढ्ने कुरामा जोड दिए ।
सहायक क्याम्पस प्रमुख इन्द्रप्रसाद भुसालले होराइजन मा.वि.ले विगतदेखि नै यस्ता गतिविधिहरू गर्दै आएको र विद्यार्थीहरूमा व्यवहारिक ज्ञान सिकाउन आफूहरू प्रतिबद्ध रहेको कुरा स्मरण गर्दै सम्पूर्ण प्राध्यापक तथा विद्यार्थीहरूलाई बधाई दिए ।
पुरस्कार वितरण समारोहमा विद्यालयका प्राचार्य गोपालप्रसाद आचार्यले होराइजन देशमै एउटा ब्रान्डको रुपमा स्थापित भइसकेको हुँदा धेरै अभिभावकहरूको रोजाइमा होराइजन पर्ने गरेको कुरा उल्लेख गर्दै अभिभावकहरूको विश्वासलाई सार्थकता प्रदान गर्न विद्यालय प्रशासन निरन्तर लागिरहेको बताए ।
यसैगरी कार्यक्रमका सभाध्यक्ष एवम् विद्यालय व्यवस्थापन समितिका अध्यक्ष ज्ञानेन्द्र प्रसाद कसजू श्रेष्ठले विद्यालयको भौतिक संरचना, यातायात सुविधा, शिक्षक कर्मचारीहरूको सेवा सुविधा विद्यार्थी तथा शिक्षक तथा कर्मचारीहरूका लागि तालिम, सेमिनार जस्ता कुराहरूमा सञ्चालक समिति सधै चनाखो हुने बताउँदै विद्यार्थी, शिक्षक, अभिभावक तथा सञ्चालकहरूले यथेस्ट ध्यान दिन सकियो भनेमात्र विद्यालयलाई थप उचाईंमा पु¥याउन सकिने बताए ।
उक्त कार्यक्रमको सञ्चालन अतिरिक्त क्रियाकलाप संयोजक डा. मुरारि प्रसाद पराजुलीले गरेका थिए ।
