गत जेठ दुई गतेदेखि गौतम बुद्ध अन्तर्राष्ट्रिय विमानस्थलबाट उडान शुरु गरेको जजिराले हुस्सुको कारण देखाउँदै तीन महिनादेखि उडान स्थगित गरेको थियो।

पछिल्ला दिनहरूमा मौसममा क्रमिक सुधार भएपछि उडान हुन लागेको विमानस्थल प्रशासनले जनाएको छ।

जजिराले जेठ २ गतेदेखि पुस ३ गतेसम्म गौतम बुद्ध अन्तर्राष्ट्रिय विमानस्थलबाट १५४ वटा उडान र त्यतिकै संख्यामा अवतरण गरेको थियो।

सो अवधिमा १३ हजार ५९३ जना यात्रु विमानस्थल अवतरण गर्दा १८ हजार २५ जना यात्रुले भैरहवाबाट उडान भरेका थिए।

जजिराले उडान रोकेपछि भैरहवामा रहेका निजी क्षेत्रका संघसंस्था, पर्यटन व्यवसायी लगायतले पुनः उडान सुरू गर्न माग गर्दै आएका थिए।

नयाँ हवाई रुट कहिले?

हाल हुस्सुको कारण अन्तर्राष्ट्रिय उडान नभएपनि यो विमानस्थलमा अन्तर्राष्ट्रिय उडानका लागि भारतको अनुमति पहिलो विषय बनेको छ। केही दिनअघि भारतीय विदेश सचिव विनय क्वात्रा २ दिने नेपाल भ्रमणमा आएको अवस्थामा पनि नयाँ हवाइ रुट र भारतीय अनुमतिको विषयले प्राथमिकता पाउन सकेन।

भारतीय सचिवसँगको भेटमा नेपाल तर्फबाट थप हवाई प्रवेश मार्गका साथै गौतम बुद्ध अन्तर्राष्ट्रिय विमानस्थल नजिकको सीमा उडान सञ्चालनका लागि सहमतिका सम्बन्धमा अनुरोध गरिएको थियो। करिब १५ दिनअघि नै सो सम्बन्धमा परराष्ट्रमा प्रस्ताव पठाइएको भए पनि यस बारे केही छलफल नै हुन नसकेको बताइएको छ।

जजिराले पुनः नियमित अन्तर्राष्ट्रिय उडान गर्ने भनिएपनि अरू एयर कम्पनीले चासो दिएका छैनन्। विमानस्थलका महाप्रबन्धक गोविन्द दाहालले मार्चदेखि नेपाल एयरलाइन्स र हिमालय एयरलाइन्सले नियमित उडान गर्न सक्ने बताए।

भारतीय नागरिकलाई गौतम बुद्ध अन्तर्राष्ट्रिय विमानस्थलबाट अन्तर्राष्ट्रिय उडानका लागि आवश्यक पर्ने नो अब्जेक्सन सर्टिफिकेट दिने व्यवस्था नभएको र इन्स्ट्रुमेन्ट ल्याण्डिङ सिस्टम सञ्चालनमा ल्याउन पनि भारतबाट सहमति लिनुपर्ने हुँदा अन्तर्राष्ट्रिय उडान प्रभावित बनेका हुन्।