भैरहवा । झन्डै ३१ अर्ब रुपैयाँ खर्चेर बनेको भैरहवास्थित गौतम बुद्ध विमानस्थलबाट सात महिनामात्रै अन्तर्राष्ट्रिय उडान भयो । हुस्सुलाई कारण देखाउँदै गत पुसदेखि बन्द अन्तर्राष्ट्रिय उडान फेरि कहिलेदेखि सञ्चालन हुने हो, टुंगो छैन न त सरकारले सम्भाव्यता अध्ययन प्रतिवेदनअनुसार नै यो विमानस्थलको उपयोग गर्न सकेको छ ।
एसियाली विकास बैंक र नागरिक उड्डयन प्राधिकरणले २०६१ सालदेखि गौतम बुद्ध अन्तर्राष्ट्रिय विमानस्थलको सम्भाव्यता अध्ययन सुरु गरेका थिए । यी दुई निकायको प्रतिवेदनलाई आधार मानेर सरकारले २०७१ सालदेखि विमानस्थल निर्माण कार्य सुरु गर्यो । विमानस्थललाई अन्तराष्ट्रिय बौद्ध सर्किटसँग जोड्ने, त्रिभुवन अन्तर्राष्ट्रिय विमानस्थलको विकल्पका रूपमा प्रयोग गर्ने र बौद्धमार्गी बहुल देशबाट सीधा उडान भर्दै लुम्बिनीमा धार्मिक पर्यटक बढाउने परिकल्पनासहित आयोजना सुरु भएको हो । तर, प्रतिवेदनमा उल्लेख भएअनुसार कुनै पनि काम हुन सकेको छैन ।
यो विमानस्थलमा गत जेठ २ देखि जजिरा एयरवेजले पहिलो अन्तर्राष्ट्रिय उडान सुरु गरेको थियो । मध्यरातमा उडान गर्ने जजिराले मौसमको पूर्वानुमान तथ्यांक नपाउँदा उडान तालिका तय गर्न नपाएको विमानस्थल आयोजनाले जनाएको छ ।
मलेसिया चार्टर उडान भर्दै आएको हिमालय एयरलाइन्सले यात्रु नपाएपछि उडान रोकेको छ । न त राष्ट्रिय ध्वजावाहक नेपाल वायुसेवा निगमले नै भैरहवाबाट अन्तर्राष्ट्रिय उडान भर्न तदारुकता देखाएको छ । उड्डयन प्राधिकरणले काठमाडौं विमानस्थलबाट दैनिक तीनभन्दा बढी उडान गर्ने वायुसेवा कम्पनीले चौथो उडान भैरहवा विमानस्थलबाट गर्नुपर्ने भनी ताकेता गर्दा पनि कार्यान्वयन नभएको विमानस्थलका महाप्रबन्धक गोविन्द दाहालले बताए ।
विभिन्न छुट दिए पनि भैरहवाबाट उडान गर्न वायुसेवा कम्पनीहरु अनिच्छुक देखिएका छन् । लुम्बिनी विश्वका २० मुलुकका करिब एक अर्ब बुद्ध अनुयायीको तीर्थस्थल हो । जीवनमा एकपटक लुम्बिनी पुग्ने धोको हरेक बौद्धमार्गीको हुन्छ । तर, सीधा हवाई सम्पर्क नहुँदा लम्बिनी आउन चाहने पर्यटकलाई काठमाडौं वा भारत हुँदै आउनुपर्ने बाध्यता छ । यो विमानस्थललाई दिगो रूपमा सञ्चालन गर्न सरकारले बौद्ध धर्मावलम्बी बढी भएका मुलुकमा सिधा उडानका लागि कूटनीतिक पहल गर्न आवश्यक छ ।
