लुम्बिनी प्रदेशमा सरकार गठनका लागि आह्वान भएको छ । प्रदेश प्रमुखको कार्यालयले बिहीबार विज्ञप्ती जारी गर्दै सरकार गठनका लागि आह्वान गरेको हो ।
प्रदेश प्रमुख अमिक शेरचनले पुस २७ गते दिउँसो ४ बजेसम्मको समयावधि दिएर सरकार गठन गर्न दलहरुलाई आह्वान गरेका हुन् । उनले संविधानको धारा १६८ (२) अनुसार मुख्यमन्त्रीमा दावी पेश गर्न आह्वान गरेका छन् ।
प्रदेशमा कुनै पनि राजनीतिक दलको एकल बहुमत छैन । त्यसैले कुनै दलको पनि बहुमत नभएकाले दुई वा दुई भन्दा बढी दलको समर्थनमा बहुमत प्राप्त प्रदेशसभा सदस्यलाई मुख्यमन्त्रीमा दावी पेश गर्न आह्वान गरिएको छ ।
लुम्बिनी प्रदेश सभा ८७ सदस्यीय छ । यहाँ बहुमतको सरकार बनाउनका लागि ४४ प्रदेशसभा सदस्य आवश्यक पर्छ । संघको सत्ता समिकरण अनुसार लुम्बिनीमा सत्ता गठबन्धनमा रहेका दलहरुसँग सरकार गठनका लागि बहुमत छ । सत्ताघटकसँग प्रदेशमा ५२ प्रदेशसभा सदस्य छन् । स्वतन्त्रबाट जितेका रोल्पाका दिपेन्द्र पुन पनि माओवादीमा प्रवेश गरेकाले यो संख्या ५३ पुगेका छ ।
प्रदेशमा नेकपा एमालेका २९, माओवादी केन्द्रका १०, राप्रपा र नागरिक उन्मुक्ति पार्टीका ४–४ प्रदेशसभा सदस्य छन् । यस्तै, जनता समाजवादी पार्टी र जनमत पार्टीका ३–३ प्रदेशसभा सदस्य छन् । विपक्षमा रहेका कांग्रेसका २७, लोसपाका ३, राष्ट्रिय जनमोर्चा र नेकपा एकीकृत समाजवादीका १–१ जना र स्वतन्त्र २ जना प्रदेशसभा सदस्य छन् ।
यस हिसावले लुम्बिनीमा केन्द्रको समिकरण अनुसारै सरकार बन्ने देखिन्छ । लुम्बिनीको मुख्यमन्त्रीका लागि नेकपा एमाले र नेकपा माओवादी केन्द्रले दावी गरेका छन् । यहाँ एमालेले सरकारको नेतृत्व गर्ने अवसर पाए संसदीय दलका नेता लीला गिरी मुख्यमन्त्री बन्नेछन् भने माओवादीले पाए संसदीय दलका नेता जोखबहादुर महरा मुख्यमन्त्री बन्ने छन् ।
